Германия Ўзбекистон фуқароларини ишга таклиф қилмоқда. Маош 2,4 минг евродан бошланади

Германияда ишлаш истагида бўлган ўзбекистонликлардан турли соҳалар бўйича ишларга аризалар қабул қилинмоқда. Бу ҳақда Ташқи меҳнат миграцияси агентлиги маълум қилди.

Номзодлар қуйидаги соҳаларда ишга таклиф этилади:

• пайвандчи;
• муҳандис-механик;
• саноат механиги;
• мехатроника муҳандиси;
• омбор логистикаси;
• металл технологияси муҳандиси.

Ишчиларга 2 420 евродан бошлаб ойлик маош ажратилади, Ўзбекистондан Германияга авиачипта ва трансфер харажатлари иш берувчи томонидан қоплаб берилади. Уларга арзонлаштирилган яшаш жой топишга ёрдам берилади ҳамда ҳафтасига 40 соат иш билан таъминланади.

Номзодлар учун малака ва тил мажбуриятлари:

• 45 ёшгача бўлиши;
• немис тилидан Гёте ёки ECL дан олинган А2 сертификат (А1 сертификатига эга фуқаролар ҳам рўйхатдан ўтишлари мумкин ва улар танлаб олиниб, виза ҳужжатлари бошлангунга қадар тил билимини тасдиқловчи А2 сертификат тақдим этишлари лозим);
• саноат механиги, мехатроника техниги, металл технологияси бўйича мутахассис, махсус омбор ходими, қишлоқ хўжалиги ва техникаси механиги/мехатроника техника каби соҳаларда касбий таълимни тамомлаган ва ўрта махсус таълим олгани ҳақида диплом;
• автомобилсозлик, машинасозлик, аграр хўжалиги машинасозлиги техник йўналишида бакалавр диплом;
• соҳада камида бир йиллик тажрибага эга бўлиши.

Қайд этилишича, қишлоқ хўжалиги ёки қурилиш техникаси саноати ва саноат логистикаси ҳамда гидравлика ёки электрон компонентларни йиғиш, форклифтларни (stapler) ҳайдаш тажрибаси танлов жараёнида афзалликка эга.

Номзодларларга мослашувчан, смена ишлаш, жамоада ишлаш қобилияти ва масъулияти, техник қобилиятга эга бўлиши, судланмаган ва жисмонан соғлом бўлиши каби қўшимча талаблар ҳам мавжуд.

Номзодлар хорижга чиқиш паспорти, коллеж, техникум ёки бакалавр дипломи, немис тилини билиш ҳақидаги сертификат, судланмаганлик тоғрисида тасдиқнома ҳамда таржимаи ҳол (Lebenslauf)ни пдф шаклда онлайн жўнатиши керак. Аризалар қуйидаги ҳавола орқали қабул қилинади.

Апрель ўрталарида Ташқи меҳнат миграцияси агентлиги чет элда ишламоқчи бўлган Ўзбекистон фуқаролари учун Германия, Исроил, Япония, Россия, Латвия, Литва, Болгария, Польша давлатларига бўш иш ўринлари таклиф этилётганини маълум қилганди. Шунингдек, Бандлик ва меҳнат муносабатлари вазирлиги бошқарма бошлиғи Зоҳид Асқаров айрим фирибгарлар чет элга ишлаш учун юборишини айтиб фуқаролардан 6 минг долларгача пул олаётгани, алданганлар пулдан ҳам, хорижда ишлашдан ҳам қуруқ қолаётганини айтганди.