АОКАда 5 апрель куни ўтказилган матбуот анжуманида Бандлик ва меҳнат муносабатлари вазирлиги ва Ташқи меҳнат миграцияси агентлиги мутасаддилари соҳада амалга оширилган ишлар юзасидан маълумот берди.
Қайд этилишича, 2016—2022 йилларда ташқи меҳнат миграцияси йўналишида жуда муҳим қадамлар қўйилган. Соҳага доир 17 та муҳим ҳужжат, жумладан, Ўзбекистон Республикасининг 2 та Қонуни, президентнинг 9 та қарори, 1 та фармон, Вазирлар Маҳкамасининг 5 та қарори қабул қилиниб, норматив-ҳуқуқий база яратилган. Хусусан, «Хусусий бандлик агентликлари тўғрисида»ги Ўзбекистон Республикаси қонуни қабул қилинган ва такомиллаштирилган.
Ташқи меҳнат миграцияси агентлиги томонидан 2021 йилда 108 минг 592 нафар фуқаро хорижий давлатларда ишга жойлаштирилган. Шундан 100 минг 111 нафари Россия Федерациясига, 6 минг 924 нафари Қозоғистон Республикасига, 1 минг 532 нафари Жанубий Кореяга, шунингдек, БАА, Туркия, Польша ва бошқа давлатларга ишлаш учун юборилган.
2022 йилнинг биринчи чорагида 3 минг 522 нафар фуқаро хорижий давлатларда ишга жойлаштирилган. Шундан 2 минг 183 нафари Россия Федерациясига, 44 нафари Қозоғистон Республикасига, 1 минг 293 нафари Жанубий Кореяга ва бошқа давлатларга ишлаш учун юборилган.
Ташқи меҳнат миграцияси агентлиги томонидан 2 минг 167 нафар меҳнат мигрантига ҳуқуқий ёрдам, 51 минг 498 нафар меҳнат мигрантига маслаҳат хизматилари, 2 минг 930 нафар меҳнат мигрантига ижтимоий ёрдам, 976 нафар меҳнат мигрантига моддий ёрдам кўрсатилган.
Хориждан қайтган 192 минг 683 нафар фуқаронинг 15 мингдан ортиғини бандлиги таъминланди, 2 минг 813 таси касб ва тадбиркорликка ўқитилган.
Изоҳ (0)