Ташқи меҳнат миграцияси агентлиги Жанубий Кореяга ишга кетиш билан боғлиқ жараёнлар ҳақида ижтимоий тармоқларда тарқалган турли хабарларга муносабат билдирди.
Қайд этилишича, Жанубий Кореяда ишлаш учун бўлиб ўтаётган имтиҳонларда ноқонуний хатти-ҳаракатларни амалга ошириш мақсадида турли гуруҳларнинг шаклланиши, имтиҳонларга электрон воситалар, шпаргалкаларни олиб киришга уриниш, ушбу режалар амалга ошмагач, турли бўҳтонлар тарқатиш ҳолатлари учрамоқда.
Маълумотларга кўра, 2023 йилда имтиҳон бошлангандан буён EPS-Topik имтиҳони тартибларига риоя қилмаган 100 нафарга яқин номзод тестдан четлаштирилган.
“Агар ижтимоий тармоқларда баён этилганидек тест имтиҳонига ноқонуний, хусусан, 40 ёшдан катталарнинг кириши каби асослантирилган ҳолатлар мавжуд бўлса, далилларни агентликка ёки ҳуқуқ-тартибот органларига тақдим қилиш сўралади.
Шу муносабат билан, юртдошларимиздан, асослантирилмаган турли хабарларга ҳамда Корея Республикасига ишга кетиш билан боғлиқ жараёнларда воситачилик хизматларини таклиф этаётган шахсларга ишонмасликни сўраймиз”, — дейилади муносабатда.
Агентлик меҳнат миграцияси барча жараёнларининг очиқ, адолатли ва қонуний бўлиши тарафдори ҳамда соҳага оид барча саволларга жавоб беришга тайёрлигини маълум қилади.
Апрель ўрталарида Ташқи меҳнат миграцияси агентлиги чет элда ишламоқчи бўлган Ўзбекистон фуқаролари учун Германия, Исроил, Япония, Россия, Латвия, Литва, Болгария, Польша давлатларига бўш иш ўринлари таклиф этилаётганини маълум қилганди. Шунингдек, Бандлик ва меҳнат муносабатлари вазирлиги бошқарма бошлиғи Зоҳид Асқаров айрим фирибгарлар чет элга ишлаш учун юборишини айтиб фуқаролардан 6 минг АҚШ долларигача пул олаётгани, алданганлар пулдан ҳам, хорижда ишлашдан ҳам қуруқ қолаётганини айтганди.
Изоҳ (0)