Германия ва Ўзбекистон миграция тартибини сезиларли даражада осонлаштирадиган миграция келишуви устида ишламоқда. Бу ҳақда Германиянинг MiGAZIN нашрига таяниб, “Дунё” агентлиги хабар берди.
Қайд этилишича, ишлаб чиқилаётган келишув таълим ва меҳнат миграцияси соҳасидаги ҳамкорликни ривожлантиришга қаратилган. Шунингдек, ҳужжат ўзбекистонлик талабалар ва ишчиларга Германияда ўқиш ва ишлаш имконини беради.
“Миграция соҳасидаги ҳамкорлик ҳам икки давлат ўртасидаги иқтисодий ва маданий алоқаларни ривожлантириш учун янги имкониятлар очмоқда”, — дейилади хабарда.
Ўзбекистоннинг Берлиндаги элчихонаси маълумотларига кўра, сўнгги бир йилда 300 га яқин ўзбекистонлик Германияда, асосан, дуал таълим орқали ишга жойлаштирилган. “Келгусида Германияда меҳнат қилаётган Ўзбекистон фуқаролари сони сезиларли даражада ошиши кутилмоқда”, — дея таъкидланади хабарда.
2022 йил декабрда Россияда 200 минг нафар ўзбекистонлик норасмий ишлаётгани маълум қилинганди. Шунингдек, Бандлик ва меҳнат муносабатлари вазирлиги бошқарма бошлиғи Зоҳид Асқаров айрим фирибгарлар чет элга ишлаш учун юборишини айтиб фуқаролардан 6 минг долларгача пул олаётгани, алданганлар пулдан ҳам, хорижда ишлашдан ҳам қуруқ қолаётганини айтганди. 2023 йилнинг апрель ўрталарида чет элда ишламоқчи бўлган Ўзбекистон фуқаролари учун Германия, Исроил, Япония, Россия, Латвия, Литва, Болгария, Польша давлатларига бўш иш ўринлари таклиф этилаётгани тўғрисида хабар берилганди.
Изоҳ (0)