Польша вазирлари 2024 йил 12 майда Marywilska 44 савдо марказида юз берган ёнғинда Россияни айблади. Тегишли айблов адлия вазири Адам Боднар ва ички ишлар вазири Томаш Семоняк томонидан илгари сурилди.
Вазирларнинг таъкидлашича, савдо марказини ёқиш ҳаракатини Россия ҳудудида жойлашган шахс ташкил этган. Жиноятчиларнинг баъзилари аллақачон ҳибсга олинган.
Тўпланган далилларга асосланиб ёнғин Россия махсус хизматларининг буюртмаси билан уюштирилган ўт қўйиш натижасида юз берганини аниқладик. Биз ўт қўйишнинг тартиби ва жараёни, шунингдек, жиноятчилар томонидан қандай ҳужжатлаштирилгани ҳақида батафсил маълумотга эгамиз, дейилади баёнотда.
Ёнғин оқибатида савдо маркази бутунлай ёниб кетган эди: олов 63 минг квадрат метр майдонни қамраб олган, 1400 га яқин ижарачининг павильонлари ва товарлари куйиб кетган. Ёнғин 5 соатдан ортиқ давом этган. Ёнғиндан кейин мутахассислар олов қисқа вақт ичида жуда катта майдонга тарқалгани, бу тасодифий ёнғин учун ғайритабиий ҳолат эканини айтган.
Изоҳ (0)