Туркия президенти Ражаб Тоййиб Эрдўғон Польшага тушган ракеталарнинг Россияга алоқасини инкор этди, деб ёзмоқда Reuters.
«Россиянинг содир бўлган воқеага алоқаси йўқ, деб ўйлайман» — деди Туркия раҳбари Индонезияда бўлиб ўтган G20 саммити чоғида журналистларга.
Эрдўғоннинг қўшимча қилишича, Туркия Россиянинг баёнотига ҳурмат билан қарайди. Шунингдек, у Германия канцлери Олаф Шольц билан бўлиб ўтган воқеани муҳокама қилганини айтди. Шольц ҳодиса юзасидан батафсил текширув ўтказиш зарурлигини таъкидлаган.
Бундан ташқари, Туркия раҳбари АҚШ президенти Жо Байденнинг позициясини эслатди. Байден «дастлабки маълумотлар Польшага ракеталар Россиядан учирилганини рад этмоқда» деганди.
Польшага ракеталар келиб тушди
15 ноябрь куни Украина ҳудуди ёппасига ҳужумга учради, энергетика инфратузилмаси объектлари унинг нишонига айланди. Ҳукумат портлашлар ва электр энергиясидаги узилишлар ҳақида маълум қилди.Шундан кейин Польшанинг Радио Зет радиоси Украина билан чегарадан 8 км узоқликда, Люблинск вилоятидаги Пшеводов қишлоғида жойлашган дон қуритиш иншоотида портлаш юз бериб, оқибатда икки киши ҳалок бўлганини маълум қилди. Ёнғин хизмати ҳодиса сабаби ҳозирча номаълумлигини қайд этди.
Польшада миллий хавфсизлик қўмитаси фавқулодда йиғилиш ўтказди, шундан кейин Варшава баъзи ҳарбий қисмларда жанговар шайликни оширди. Польша президенти Анжей Дуда 16 ноябрга Миллий хавфсизлик кенгаши йиғилишини ҳам белгилаган.
Reuters ёзишича, шу куниёқ Польша илтимоси билан НАТО элчилари фавқулодда учрашув ўтказади, у альянс уставининг томонлардан бирининг ҳудудий яхлитлиги, сиёсий мустақиллиги ёки хавфсизлиги таҳдид остида қолган тақдирда, маслаҳатлашувлар олиб бориш ҳақидаги 4-моддаси асосида ташкил этилади. Шунингдек, 16 ноябрга БМТ Хавфсизлик кенгашининг Украинадаги вазият бўйича мажлиси ҳам белгиланган.
Россия портлашга алоқадорлигини рад этмоқда
Бир қатор мамлакатлар ҳодисада Россияни айблади. Россия Мудофаа вазирлиги портлашга алоқадорлигини рад этди ва Польша—Украина чегарасига яқин объектларга зарбалар берилмаганини маълум қилди. Мудофаа идораси бундай хабарларни «кескинликни кучайтиришга қаратилган провокация» деб атади. Пентагон Польшага келиб тушган ракеталар Россияники бўлганини ҳозирча тасдиқлай олмаслигини билдирди. ОАВларга кўра, воқеа жойидан топилган ракета бўлакларида ёзувлар йўқ.Дуда Варшавада ракеталарнинг келиб чиқиши ҳақида аниқ маълумотлар йўқлигини айтди. «Кун бўйи Россиянинг Украинага қарши ракета ҳужуми давом этганини аниқ биламиз, бироқ айни пайтда бизда бу ракетани ким учиргани юзасидан аниқ далиллар йўқ», — деди у.Бу орада Польша Ташқи ишлар вазирлиги Россия элчиси Сергей Андреевни чақиртирди ва ундан Украина ўққа тутилганидан кейин Польшанинг чегарага яқин қишлоғига «Россияда ишлаб чиқарилган снаряд келиб тушгани» юзасидан «зудлик билан батафсил тушунтиришлар» беришни талаб қилди.
Изоҳ (0)