Дастлабки маълумотлар Польшага ракеталар Россиядан учирилганини рад этмоқда. Бу ҳақда АҚШ президенти Жо Байден Балида дунё етакчилари билан учрашув якунида айтиб ўтди.
«Дастлабки маълумотларга кўра, бу инкор этилмоқда. Мен бу ҳақда текширув тўлиқ якунланмагунича гапиришни истамайман, лекин траектория нуқтаи назаридан, бу Россиядан учирилгани эҳтимолдан узоқ. Лекин кўрамиз», — деди у.
Америка етакчиси Балида G7 ва НАТО етакчилари билан учрашгани, улар Польшанинг Украина билан чегара яқинидаги қишлоғида юз берган портлаш юзасидан текширув ўтказишда Польшани қўллаб-қувватлашга келишиб олганини ҳам айтди.
«Шундан кейин биз навбатдаги қадамимизни биргаликда аниқлаштириб оламиз. Биз, тўпланганлар, бир ёқадан бош чиқардик», — дея қўшиб қўйди Байден.
Польшага ракеталар келиб тушганидан кейин кўп ўтмай, Польша президенти Анжей Дуда Байден билан шошилинч музокаралар ўтказган. Оқ уй хабарига кўра, улар Польшадаги портлашлар юзасидан кейинги қадамларни мувофиқлаштириш ҳақида келишиб олган.
«Президент Байден Польшада текширувлар олиб бориш учун АҚШнинг тўлиқ ёрдамини таклиф қилди. Байден Қўшма Штатларнинг НАТОга қатъий содиқлигини тасдиқлади», — дейилади хабарда.
Польшага ракеталар келиб тушди
15 ноябрь куни Украина ҳудуди ёппасига ҳужумга учради, энергетика инфратузилмаси объектлари унинг нишонига айланди. Ҳукумат портлашлар ва электр энергиясидаги узилишлар ҳақида маълум қилди.
Шундан кейин Польшанинг Radio Zet радиоси Украина билан чегарадан 8 км узоқликда, Люблинск вилоятидаги Пшеводов қишлоғида жойлашган дон қуритиш иншоотида портлаш юз бериб, оқибатда икки киши ҳалок бўлганини маълум қилди. Ёнғин хизмати ҳодиса сабаби ҳозирча номаълумлигини қайд этди.
Польшада миллий хавфсизлик қўмитаси фавқулодда йиғилиш ўтказди, шундан кейин Варшава баъзи ҳарбий қисмларда жанговар шайликни оширди. Польша президенти Анжей Дуда 16 ноябрга Миллий хавфсизлик кенгаши йиғилишини ҳам белгилаган.
Reuters ёзишича, шу куниёқ Польша илтимоси билан НАТО элчилари фавқулодда учрашув ўтказади, у альянс уставининг томонлардан бирининг ҳудудий яхлитлиги, сиёсий мустақиллиги ёки хавфсизлиги таҳдид остида қолган тақдирда, маслаҳатлашувлар олиб бориш ҳақидаги 4-моддаси асосида ташкил этилади. Шунингдек, 16 ноябрга БМТ Хавфсизлик кенгашининг Украинадаги вазият бўйича мажлиси ҳам белгиланган.
Россия портлашга алоқадорлигини рад этмоқда
Бир қатор мамлакатлар ҳодисада Россияни айблади. Россия Мудофаа вазирлиги портлашга алоқадорлигини рад этди ва Польша-Украина чегарасига яқин объектларга зарбалар берилмаганини маълум қилди. Мудофаа идораси бундай хабарларни «кескинликни кучайтиришга қаратилган провокация» деб атади. Пентагон Польшага келиб тушган ракеталар Россияники бўлганини ҳозирча тасдиқлай олмаслигини билдирди. ОАВларга кўра, воқеа жойидан топилган ракета бўлакларида ёзувлар йўқ.Дуда Варшавада ракеталарнинг келиб чиқиши ҳақида аниқ маълумотлар йўқлигини айтди. «Кун бўйи Россиянинг Украинага қарши ракета ҳужуми давом этганини аниқ биламиз, бироқ айни пайтда бизда бу ракетани ким учиргани юзасидан аниқ далиллар йўқ», — деди у.
Бу орада Польша Ташқи ишлар вазирлиги Россия элчиси Сергей Андреевни чақиртирди ва ундан Украина ўққа тутилганидан кейин Польшанинг чегарага яқин қишлоғига «Россияда ишлаб чиқарилган снаряд келиб тушгани» юзасидан «зудлик билан батафсил тушунтиришлар» беришни талаб қилди.
Изоҳ (1)
Бир суткадами