Ўзбекистоннинг Малайзиядаги элчиси Каромиддин Гадоев ушбу мамлакатнинг Malakoff Corporation Berhad компанияси бош ижрочи директори Анвар Шахрин Абдул Ажиб билан учрашув ўтказди. Бу ҳақда “Дунё” АА хабар берди.
Малайзия томонига Ўзбекистонда “яшил” энергия саноати истиқболи, айниқса гидроэнергия бўйича фойдаланилмаётган улкан имкониятлар мавжудлиги таъкидланди. Малайзия томонига республика ҳудудларида дарё ва каналларда кичик гидроэлектр станцияларини қуриш ҳамда йирик қувватли гидроиншоотларни барпо этиш лойиҳаларини амалга ошириш таклиф этилди.
Анвар Шахрин Абдул Ажибнинг айтишича, компания Малайзиядаги энг йирик мустақил энергия ишлаб чиқарувчиси ҳисобланади. Умумий қуввати 8782 МВт бўлган иссиқлик ва 173 МВт қайта тикланувчи электр станцияларига эгалик қилади.
“Ўзбекистонда ъяшилъ энергия соҳасида амалга оширилаётган ислоҳотлар менда катта таассурот қолдирди. Мамлакатингиз эришган натижалар ва улкан режалардан илҳомланиб, ўзаро ҳамкорлик имкониятларини ўрганиш учун жорий йилда Ўзбекистонга боришни режалаштиряпмиз”, деган у.
Malakoff Corporation Berhad компанияси 1975 йил 9 октябрда ташкил этилган. Унинг асосий фаолияти электр энергияси ишлаб чиқариш, шўр сувни чучуклаштириш, эксплуатация ва техник хизмат кўрсатиш ҳамда чиқиндиларни бошқаришдан иборат.
2024 йилнинг декабрь ойида Ўзбекистон Жаҳон банки гуруҳи кўмагида Хоразм вилоятида янги қуёш электр станциясини ишга тушириши ҳақида хабар берилганди.
Хоразм вилоятидаги янги қуёш электр станцияси
2024 йилнинг февралида Шавкат Мирзиёевнинг Хоразм вилоятига ташрифи чоғида Тупроққалъа туманида Voltalia компанияси томонидан қуввати 100 мегаваттлик қуёш электр станцияси қурилишини бошлаш маросими бўлиб ўтганди. Бу Хоразмдаги илк шундай йирик лойиҳадир. Бу лойиҳа ишга тушса, Хоразм вилоятида электр энергияси ишлаб чиқариш қувватлари 30 фоизга ошиб, 424 мегаваттга етади. Хусусан, Тупроққалъа туманининг электрга бўлган йиллик 135 миллион киловатт соат талаби тўлиқ қондирилади.
Франциянинг Voltalia компанияси қайта тикланувчи энергетика соҳасидаги иншоотларни қуришда бой тажрибага эга. Ҳозирда дунёнинг 20 мамлакатида умумий қиймати 10 миллиард доллардан зиёд инвестиция лойиҳаларини амалга оширмоқда.
Изоҳ (0)