Россиянинг “Росатом” давлат корпорацияси Ўзбекистонга кам қувватли атом электр станциялари лойиҳаларини таклиф қилишга тайёр. Бу ҳақда Россия савдо ва саноат вазири Денис Мантуров “Иннопром. Марказий Осиё” кўргазмасида айтиб ўтди.
Бугунги кунда “Росатом” давлат корпорацияси ва “Ўзатом” агентлиги атом электр станциясини (АЭС) қуриш бўйича бош шартномани ишлаб чиқмоқда. Бу кенг кўламли ва мураккаб лойиҳадир. “Росатом” Ўзбекистонга қўшимча ечимларни, жумладан, кам қувватли атом электр станциялари билан боғлиқ бўлган ечимларни ҳам таклиф қилишга тайёр, — деди у.
Россия бош вазири ўринбосарининг сўзларига кўра, АЭС қурилиши учун жой аллақачон танланган ва бу жой Жиззах вилоятидаги Тузкон кўли яқинида жойлашган. Бу ерда ўтказилган муҳандислик тадқиқотлари атом электр станциясини қуриш учун қулай жой эканлигини тасдиқлаган. Бундан ташқари, лойиҳанинг оптимал техник конфигурацияси аллақачон аниқланган.
“Эндиликда ўзбекистонлик ва халқаро экспертлар билан биргаликда атом электр станциясини энергетика тизимига интеграциялаш, қайта тикланадиган энергия манбалари билан ҳамкорликда ишлаш, станцияни ишлатиш учун сув ҳажмини камайтириш ва электр энергиясини максимал даражада ишлаб чиқариш билан боғлиқ техник масалалар ҳудуднинг иқлимий хусусиятларини ҳисобга олган ҳолда кўриб чиқилмоқда”, — дея қўшимча қилди Денис Мантуров.
Эслатиб ўтамиз, 2017 йил декабрь ойида Ўзбекистон ва Россия ҳукуматлари атом энергиясидан тинч мақсадларда фойдаланиш тўғрисидаги битимни имзолаган эди. Шундан сўнг, 2018 йил сентябрь ойида Россия лойиҳаси бўйича Ўзбекистонда атом электр станциясини қуриш бўйича ҳамкорлик тўғрисида ҳукуматлараро битим тузилган эди.
“Росатом” Ўзбекистонда VVER-1200 реакторларига эга иккита энергоблокдан иборат комплекс қуришни режалаштирмоқда.
Изоҳ (0)