Тошкент вилоятида 29 та кичик ва микро гидроэлектр станциялар қурилади, деб хабар бермоқда вилоят ҳокимлиги ахборот хизмати.
Унга кўра, мазкур лойиҳа амалга оширилиши учун шаҳар ва туманлар ҳудудидаги қишлоқ хўжалигига мўлжалланмаган давлат захирасидаги 6,7130 гектар ер майдони Энергетика вазирлигига доимий фойдаланиш ҳуқуқи билан ажратилди.
Гидроэлектр станциялар Ўзбекистон Республикаси президентининг 2022 йил 9 сентябрдаги “Энергия тежовчи технологияларни жорий қилиш ва кичик қувватли қайта тикланувчи энергия манбаларини ривожлантириш бўйича қўшимча чора-тадбирлар тўғрисида” 220-сонли фармони талаблари асосида, Тошкент вилояти ҳокимининг тегишли қарори билан битказилиб, фойдаланишга топширилади.
Станциялар вилоятнинг Нурафшон, Чирчиқ, Ангрен шаҳри ҳамда Чиноз, Паркент, Янгийўл, Бўка, Зангиота, Оққўрғон, Оҳангарон туманларида қурилади ва лойиҳа қуввати 2 550 кВтни ташкил қилади.
Шавкат Мирзиёев Бўстонлиқ туманига ташрифи чоғида “Угам-1” кичик гидроэлектр станциясини кўздан кечирганди. Соҳага хорижий инвестиция ва хусусий секторни жалб қилиб, 2030 йилга қадар жами қувватларни 6 минг мегаваттга етказиш белгиланган. Бунинг учун ҳуқуқий, иқтисодий шароитлар яратилган. Жумладан, мамлакат бўйича икки мингтагача микро ва кичик ГЭСлар қуриш имконияти бор.
Изоҳ (0)