Эфиопия ҳукумати яқин 10 йил оралиғида кичик қувватли атом электрстанцияси қуришни режалаштирмоқда. Бу ҳақда 23 октябрь куни Эфиопия Инновациялар ва технологиялар вазири Мекурия Кума маълум қилган, деб ёзмоқда «Известия».
«Яқин 10 йил ичида, иложи борича тезроқ иккита 200 мегаватт қувватга эга станциялар қурилишини якунлашимиз лозим», — дея қайд этган вазир Сочида ўтаётган Россия—Африка форумида.
Шунингдек, Россия ҳамда Эфиопия форум доирасида атом энергиясидан тинчлик йўлида фойдаланишни келишиб олди. «Росатом» раҳбари Алексей Лихачев келишув шартларига кўра, Эфиопия ҳудудида катта АЭС қурилиши ва ишга туширилиши кўзда тутилганлигини маълум қилди.
МАГАТЕ шартларига кўра, кичик қувватли станциялар қуввати 300 мегаваттга тенг деб белгиланган.
2018 йил майида «Росатом»нинг Иорданияда кичик қувватли реактор қуришни режалаштиргани хабар қилинган. 2019 йилда Лихачев Саха республикасида (Якутия) РИТМ-200 электрик станцияси негизида янги кам қувватли реактор ишга туширилишини маълум қилган.
Изоҳ (0)