Россиянинг “Росатом” давлат корпорацияси Қирғизистонда кичик атом электр станциясини қуриш ниятида. Бу ҳақда “Переток.ру” хабар берди.
“Менинг фикримча, жаҳон экспорти учун шундай флагман бўладиган бизнинг биринчи экспорт жўнатмамиз Қирғизистонга бўлади. Қирғизистон Россия технологиясидан фойдаланган ҳолда кичик атом электр станциясини қуриш бўйича энг катта динамикани намойиш этмоқда”, — деди Россия компанияси раҳбари Алексей Лихачев Евросиё конгрессида.
“Атомэнергопром” йиллик ҳисоботида маълум қилишича, “Росатом” Қирғизистон, шунингдек, Мянма учун кичик заводнинг дастлабки техник-иқтисодий асослаш ишларини 2023 йилда якунлашни режалаштирмоқда.
Бундан ташқари, жорий йилда дастлабки техник-иқтисодий асосларни Ҳиндистондаги кичик атом электр станциясига топшириш режалаштирилган.
2022 йилнинг ноябрида Rusatom Energy Projectс ва Қирғизистон Энергетика вазирлиги “Аtomexpo-2022” кўргазмаси доирасида мамлакатда кичик қувватли атом электр станциясини қуриш бўйича дастлабки техник-иқтисодий асослаш бўйича техник топшириқларни имзолаган эди.
Музокаралар чоғида Қирғизистон Соғлиқни сақлаш вазирлиги ва “Росатом” ўртасида соғлиқни сақлашда энергия бўлмаган ядро технологияларини қўллаш бўйича ўзаро англашув ва ҳамкорлик меморандуми имзоланди.
Ушбу ҳужжат Қирғизистонда юқори технологияли тиббиёт лойиҳаларини биргаликда ишлаб чиқишга қаратилган.
“Гап Миллий онкология ва гематология маркази негизида онкологик ва бошқа касалликларни ташхислаш ва даволашнинг илғор усуллари қўлланадиган радиофармацевтика дорихонаси ва молекуляр томография марказини ташкил этиш ҳақида бормоқда”, — дейилади Қирғизистон республикаси Вазирлар Маҳкамасида.
Ўзбекистонда атом энергетикаси билан боғлиқ вазият қандай?
Ўзбекистонда атом энергияси манбалари ҳам фаол ривожланмоқда. 2033 йилда Ўзбекистон ҳукумати биринчи атом электр станциясини ишга туширишни режалаштирмоқда. Унинг қурилиши 11 миллиард долларга баҳоланмоқда.
Атом электр станцияси VVER-1200 реакторларига эга иккита 3+ авлод энергия блокларини ўз ичига олади. АЭСнинг умумий қуввати 2,4 ГВтни ташкил қилади.
Тошкент АҚШ, Хитой, Франция ва Жанубий Корея компаниялари томонидан атом электр станцияларини қуриш имкониятларини кўриб чиқди.
Натижада танлов Россия фойдасига амалга оширилди. “Ўзатом” агентлиги раҳбари Жўрабек Мирзамахмудовнинг сўзларига кўра, бу қарор “республиканинг соф иқтисодий манфаатларидан келиб чиққан ҳолда” қабул қилинган ва “спонтан ёки сиёсий” эмас.
2017 йил 29 декабрь куни Россия ва Ўзбекистон ҳукуматлари ўртасида атом энергетикаси соҳасида ҳамкорлик тўғрисидаги битим имзоланган эди. Ҳужжатни тайёрлаш олти ой давом этди.
2018 йилнинг 7 сентябрь куни Москвада Ўзбекистон ҳудудида атом электр станциясини қуриш бўйича келишув имзоланган эди.
Жиззах вилоятининг Фориш туманидаги Айдаркўл кўли яқинидаги, Навоий вилояти билан чегарадош ҳудуд атом электр станциясини қуриш учун устувор жой сифатида танланди.