Ўзбекистонда қурилиши режалаштирилган АЭС ҳозир қайси босқичда эканлиги ҳақида маълумот берилди

Энергетика вазири Жўрабек Мирзамаҳмудов Ўзбекистонда қурилиши режалаштирилган АЭС ҳозир қайси босқичда эканлиги ҳақида маълумот берди.

Жўрабек Мирзамаҳмудовнинг айтишича, музокаралар давом этяпти.

“Бизда МАGATEнинг талабларига асосан процедуралар амалга ошириляпти. Яъни майдонни лицензиялаш, меъёрий ҳужжатларни ишлаб чиқиш жараёнлари кетмоқда.

Сўнгги пайтларда кичик модулли реакторлар бўйича технологиялар ривожланяпти. Келишувга асосан шуни ҳам параллел равишда таҳлил қиляпмиз. Катта станция қуриш керакми ёки кичик қувватли станциялар қуриш бўйича ҳозир таҳлиллар олиб бориляпти. Нафақат Россия, бошқа хорижий давлатлар тажрибаси, технологияси ўрганиляпти. Шунинг учун бу борада ишни тўхтатганимиз йўқ. Жуда катта стратегик лойиҳа бўлгани учун шошилмасдан, барча нарсани ўлчаб, етти марта эмас, етмиш етти марта ўлчаб, ҳамма нарсасининг ҳисоб-китобини, таҳлилини қилган ҳолда президентимизга ҳисобот кирита оламиз.

Ҳозирча биз ўрганиш, музокаралар олиб бориш, ҳисоб-китоблар қилиш бўйича ишларни олиб боряпмиз”, — деди энергетика вазири.

Аввалроқ Ўзбекистон ўзи табиий газга эҳтиёжи бўла туриб, нима учун газ экспорт қилиши ҳақида изоҳ берилган эди.