Ҳозирда Хитой бозорида таклиф этилаётган енгил автомобилларнинг аксарияти ҳайдовчини бошқарув жараёнидан узоқ вақт чалғитишга йўл қўймайдиган иккинчи даражали автопилот билан жиҳозланган. GAC Aion ва Didi ташкил этган қўшма корхона жорий йил охиригача тўртинчи даражали автономлик билан ишлайдиган ҳайдовчисиз таксилар ишлаб чиқаришни йўлга қўйишни режалаштирмоқда. Бу ҳақда CarNewsChina хабар бермоқда.
САE таснифига кўра, бу инсон фойдаланиши мумкин бўлган анъанавий бошқарув мосламаларининг мавжудлигини англатади, бироқ автоматиканинг кўп ҳолларда ҳайдовчи аралашувисиз ишлаш қобилиятини назарда тутади.
Таъкидланишича, бир ҳафта олдин GAC Aion va DiDi Autonomous Driving ўзларининг Guangzhou Andi Technology қўшма корхонаси лицензия олганини эълон қилди. Мазкур корхона жорий йил охиригача тўртинчи даражали автономликка эга ҳайдовчисиз таксиларни оммавий ишлаб чиқаришни йўлга қўйишни мўлжалламоқда. Ушбу транспорт воситасини ишлаб чиқиш аллақачон якуний босқичда. Бу Хитойда ушбу синфдаги автопилотга эга биринчи автомобиль бўлади.
Ишлаб чиқувчилар кузовнинг машҳур ва кўп қиррали тури – кроссоверни танладилар. Транспорт хизматларини кўрсатишга йўналтирилганлик орқа ўриндиқда йўловчилар учун кенг жой назарда тутилган салон жойлашувида ўз аксини топади.
Ушбу ҳамкорликда GAC Aion аппарат базаси ва оммавий ишлаб чиқариш учун масъул, DiDi эса дастурий таъминотни ишлаб чиқиш ва бошқарув электроникасининг бир қисми билан шуғулланади. Шунингдек, DiDi ҳайдовчисиз таксилар паркини бошқариш имконини берувчи ахборот инфратузилмасини таъминлаш учун ҳам жавобгар бўлади.
Ҳозирги DiDi аппарат платформаси камералар, лидар ва турли диапазондаги радарлар, шунингдек микрофонларни ўз ичига олган жами 33 та сенсордан фойдаланишни назарда тутади. Бундай комбинация ҳар қандай об-ҳаво шароитида транспорт воситаси атрофидаги вазиятни юзлаб метр масофада назорат қилиш имконини беради. DiDi ҳайдовчисиз таксиларни ўзининг операцион тизими билан жиҳозлайди.
Эътиборли жиҳати шундаки, GAC жорий йилнинг тўртинчи чорагига қадар Хитой бозорига автономликнинг учинчи даражасига эга енгил автомобилларни алоҳида олиб чиқишни режалаштирмоқда. Келгуси йилда моделлар ассортименти кенгайтирилади. GAC раҳбарияти Хитой холдинги олдига 2027 йил якунига кўра автопилот соҳасида жаҳон етакчилари қаторига кириш вазифасини қўймоқда. Бошқа ҳайдовчисиз такси ишлаб чиқарувчилари орасида GAC аллақачон Хитойнинг бешта йирик шаҳри кўчаларида 40 миллион километрдан ортиқ масофада тўпланган маълумотларга эга бўлган Pony.ai компанияси билан ҳамкорлик қилмоқда.
Изоҳ (0)