Тошкент вилоятининг 7 та шаҳрида брутто-шартнома асосида 21 та йўналишига 170 та янги автобусни харид қилиниши белгиланди, деб хабар бермоқда вилоят ҳокимлиги матбуот хизмати.
-pC61nL7m.jpg)
Қайд этилишича, бу борада тадбиркорлар танловлар асосида аниқланиб, Ангрен шаҳридан рўйхатдан ўтган “Ангрен авто гроуп” МЧЖ томонидан Хитойдан 15 та Yutong автобусни банк кредити асосида харид қилиш бўйича шартнома имзоланди. Автобуслар яқин кунларда олиб келиниб, фойдаланишга топширилади.
Олмалиқ шаҳридан рўйхатдан ўтган “Олмалиқ транс сервиcе” МЧЖ томонидан эса 83 та автобус харид қилиш борасида Хитойда автобус ишлаб чиқарувчи компания билан шартномалар имзолашга келишилган.
“Энг асосийси, мазкур харид қилинадиган замонавий автобусларда йўловчиларга янада қулайлик яратиш мақсадида, шаҳар жамоат транспортида автоматлаштирилган электрон тўлов тизими татбиқ этиш кўзда тутилган”, дейилади ҳокимлик хабарида.
Маълум қилинишича, 2025 йилда жамоат транспорти етиб бормаган ҳудудларни қамраб олган ҳолда 12 та янги йўналиш ташкил этилади. Шунингдек, автотранспортларни диспетчерлик марказига интеграция қилиш ҳамда шаҳар автобус йўналишларида автоматлаштирилган тўлов тизимини тўлиқ йўлга қўйилади.
Зоир Мирзаев 2024 йил октябрида ўтказган ҳокимлик соатида Тошкент вилоятида транспорт соҳасидаги хизматларни яхшилаш учун 1000 та янги автобус харид қилиш бўйича топшириқ берганди.
Транспорт вазирлиги матбуот хизматининг билдиришича, ҳудудларда аҳолига кўрсатилаётган транспорт хизматлари сифатини яхшилаш мақсадида замонавий автобусларни олиб келиш ишлари давом этмоқда. Тошкент шаҳрига яна 1000 та Yutong автобусларини олиб келиш имкониятлари ўрганилмоқда. Андижон вилоятига Хитойдан 100 та электробус харид қилиниши режалаштирилган.
Изоҳ (0)