Йўлларда шиддат билан ҳаракатланаётган, кўзни қамаштирувчи дизайнга эга машинани тасаввур қилинг. Унинг двигатель овози юракни жунбушга келтиради, салони эса ҳашаматнинг энг юксак намунаси! Аммо бундай машинанинг энг ажабланарли жиҳати — унинг нархи. Дунёда оддий одам учун тасаввур қилиб бўлмайдиган даражада қиммат автомобиллар бор. Улар нафақат технология мўжизаси, балки ҳашамат ва нуфузлилик рамзидир.
Бугунги кунда энг қиммат автомобилларнинг аксарияти атиги бир неча нусхада ишлаб чиқарилади, баъзилари эса махсус буюртма асосида яратилиб, эгасининг диди ва истакларига мослаштирилади. Қуйида 2024 йилда энг қимматбаҳо нархга сотилган топ-10 та енгил автомобиллар ҳақида маълумот берамиз.
Aston Martin Valkyrie
Нархи: 3 миллион доллар
Британиянинг Aston Martin компанияси Red Bull Racing билан ҳамкорликда ишлаб чиққан ушбу машина Формула 1 технологияларини йўл автомобилига айлантирган мўжизадир. У дунёдаги энг қимматбаҳо ва шубҳасиз энг тез гиперкарлардан биридир.
Aston Martin Valkyrie гибрид автомобили 6,5 литрли, 12 цилиндрли двигатель ва 1155 от кучига эга электр мотор билан жиҳозланган. Автомобиль атиги 10 сонияда 320 км/соат тезликка чиқади. Дарҳақиқат, ҳар бир Aston Martin Valkyrie қўлда йиғилган бўлиб, 150 та нусхада ишлаб чиқилган.
Lykan HyperSport
Нархи: 3,4 миллион доллар
Арабистонда ишлаб чиқарилган Lykan HyperSport автомобили 2013 йилда тақдим этилган бўлиб, ўша вақтда дунёдаги энг қиммат автомобиллар топ-10 талик рўйхатида учинчи ўринни эгаллаган. Олтин билан безатилган футуристик суперкар 3,7 литрли иккита турбо двигатель билан жиҳозланган ва 2,8 сонияда 0 дан 100 км/соат тезликка чиқади. Максимал тезлиги 395 км/соатни ташкил қилади.
Мзакур автомобиль 2015 йилда “Форсаж” фильмида суратга тушган. Атиги 10 нусхада ишлаб чиқарилган Lykan HyperSport’нинг тўққизтаси суратга олиш вақтида аварияга учраган. Қолган биргина автомобиль АбуДаби полициясига топширилган ва у ҳозиргача музейда сақланиб келади.
Lamborghini Venenoо
Нархи: 4,5 миллион доллар
2013 йилда Женева автосалонида Lamborghini компаниясининг 50 йиллик юбилейига бағишлаб Lamborghini Venenо тақдим этилди. “Венено” сўзи испан тилида “заҳар” деган маънони англатади ва бу ном машинанинг қанчалик шиддатли эканини ифодалайди. Автомобиль 0 дан 100 км/соат тезликка атиги 2,8 сонияда эришади ва максимал тезлиги 355 км/соатга етади. Lamborghini Venenо Формула 1 ва Le Mance пойга машиналаридан илҳомланган дизайнга эга.
Дастлаб компания уни атиги 4 нусхани ишлаб чиқарди, улардан бири музейда сақланиш учун эди, аммо кейин сотувга яна бир нечта машина чиқарилди. Улардан бири 2021 йилдаги ким ошди савдосида 8,4 миллион долларга сотилган.
Bugatti Divо
Нархи: 5 миллион доллар
Bugatti Divо 2018 йилда Bugatti Chiron асосида яратилган бўлиб, аэродинамика ва бошқарув жиҳатидан янада мукаммаллаштирилган суперкар ҳисобланади. Машина француз пойгачиси Алберт Диво шарафига номланган бўлиб, у 1920 йилларда Bugatti жамоаси учун кўплаб ғалабаларга эришган.
Автомобиль 2,4 сонияда ва 380 км/соат максимал тезликка эришади. Диво 40 нусхада чекланган тиражда чиқарилган ва уларнинг барчаси деярли бир кунда сотилган. Қизиқарлиси, автомобилларни йиғиш 2021 йилгача давом этган. 2022 йилга келиб Дубайдаги автосалонлардан бирида Bugatti Divо 10,2 миллион долларга сотилган — бу унинг асл нархидан икки баравар қиммат.
Pagani Imolа Roadster
Нархи: 6 миллион доллар
2023 йил ноябрь ойида гиперкарлар ишлаб чиқарувчи Пагани компанияси ўзининг Имола моделини 8 дона чекланган ва усти очиқ версияда тақдим этди. Imolа Roadster саккиз секундда 350 км/соат тезликка эриша олади. Унинг ёпиқ версияси 5,4 миллион долларга баҳоланган.
Pagani Imolа Roadster 6.0 литрли тwin-турбо V12 двигатель билан жиҳозланган бўлиб, у 850 от кучига эга. Ушбу двигатель Mercedes-AMG томонидан махсус ишлаб чиқарилган ва фақат Pagani Imolа автомобиллари учун мўлжалланган. Автомобилнинг бошланғич нархи 5.4 миллион доллар, аммо бозорда у 10 миллион долларгача баҳоланиши мумкин.
Pagani Huayra Sodalungа
Нархи: 7,4 миллион доллар
Ҳуайра моделининг ушбу махсус нашри 2022 йилда 5 дона чекланган тиражда чиқарилган. Pagani Huayra Sodalungа дизайни 60 йиллар услубида ишланган бўлиб, компаниянинг энг эксклюзив ва ноёб автомобилларидан бири саналади. Ушбу модел 1960 йиллардаги Ле Манс пойга машиналаридан илҳомланган ҳолда узайтирилган кузов дизайни (лонг таил — узун дум) ва юқори даражадаги ҳашамати билан ажралиб туради.
Bugatti Centоdiesi
Нархи: 10 миллион доллар
Bugatti Centоdiesi — бу нафақат замонавий технологиялар билан жиҳозланган гиперкар, балки афсонавий Bugatti EB110 моделининг янги версияси сифатида яратилган махсус автомобиль. Centодиэcи италян тилида “110” деган маънони англатади ва у Bugatti брендининг асосчиси Ettore Bugatti тақдим этилганининг 110 йиллигига бағишлаб ишлаб чиқарилган.
Мазкур модел фақат 10 дона ишлаб чиқарилган бўлиб, энг камёб ва эксклюзив моделлардан бири саналади. Барча замонавий Bugattiлар сингари, гиперкар ҳам ақл бовар қилмайдиган имкониятларга: 1600 от кучига эга W16 двигателига эга.
Pogani Zinda HP Barchetta
Нархи: 15 миллион доллар
Ушбу модел 2017 йилда Ҳораcио Пагани шахсий буюртмаси асосида ишлаб чиқилган бўлиб, атиги 3 дона яратилган. Бу уни дунёдаги энг ноёб ва эксклюзив автомобиллардан бирига айлантиради. Автомобиль Зондаънинг стандарт модификациядан ички дизайни, кузовнинг аэродинамик жиҳатдан яхшилангани билан ажралиб турарди. Аммо двигатель қисми ўзгаришсиз қолган — у 800 от кучи, 7,3 литрли V12 блокига эга. Pagani Zonda тезлиги 355 км/соатгача етади.
Rolls-Royce Boat Tail
Нархи: 28 миллион доллар
Rolls-Royce Boat Tail миллионерлар учун яратилган ҳақиқий санъат асари. У дунёдаги энг қиммат автомобиллардан бири ҳисобланиб, фақат 3 дона нусхада ишлаб чиқарилган. Ҳар бир нусхаси мижознинг шахсий хоҳишларига мос равишда қўлда ўзгартирилган Rolls-Royce Boat Tail нархи 28 миллион доллар атрофида баҳоланади.
У Rolls-Royce Sweptail моделидан илҳомланган бўлиб, дизайнида денгиз яхталарининг эстетик элементлари акс этган. У узун кузови ва яхта шаклидаги орқа қисми билан ажралиб туради. Қўлда ишланган алюминий панеллар ҳар бир автомобилни яратишда ойлаб ишлов берилганининг ифодасидир. Энг эксклюзив жиҳатлардан бири икки қисмли “капалак” орқа багажга эгалигидадир. Улар очилганда ичидан пикник учун махсус бар ва барча керакли ашёлар намоён бўлади.
Rolls-Royce Lа Rosе Hoirе Droptail
Нархи: 32 миллион доллар
2024 йил ҳолатига кўра қайси автомобиль дунё бўйича энг қимматбаҳо бўлган? Бу Rolls-Royce Lа Rосе Ноirе Droptail Droptail модели. У 2023 йилда намойиш этилган ва 4 дона версияда чиқарилган.
Rolls-Royce Lа Rосе Ноirе Droptail Droptail улкан кабриолет бўлиб, қизил қора рангдаги “Black Baccarа” атиргулидан илҳомланиб яратилган. Унинг кўзни қамаштирувчи қизғиш-қора кузови — ёруғлик нурига қараб ўзгарувчи махсус бўёқ билан қопланган.
Яхта услубидаги кузови Rolls-Royce Boat tail услубида ишлаб чиқилган. Қўлда ясалган ёғоч панел — ички ва ташқи дизайнни уйғунлаштирувчи энг нозик деталлар билан ишланган. Ўзига хос ёрқин LED ёритгичлар мазкур автомобилни Rolls-Royce компаниясининг ғурурига айлантирган жиҳатлардан бири ҳисобланади.
Rolls-Royce Lа Rосе Ноirе Droptail Droptail капоти остида 6.75 литрли тwин-турбо V12 двигатель жойлашган бўлиб, у 593 от кучига эга. Автомобиль тахминан 5 сонияда 100 км/соат тезликка чиқади. Унинг максимал тезлиги 250 км/соатдир.
Изоҳ (0)