Россия томонининг таклифига биноан Озарбайжон делегацияси Ҳайдар Алиев таваллудининг 102 йиллигига бағишланган тадбирларда иштирок этиш учун Астрахан вилоятига жўнаб кетди. Бироқ делегация таркибида бўлган депутат Азер Бадамов Москва аэропортида ушланиб, парвозга қўйилмади. Бу ҳақда “Repost.аз” хабар берди.
Аэропортда депутатга Россияга кириш тақиқлангани маълум қилинган. Бироқ депутат ва делегацияга бу борада ҳеч қандай тушунтириш берилмаган. Натижада Азер Бадамовнинг ортга қайтишига тўғри келган.
Катта эҳтимол билан, Россия томони депутат Азар Бадамовни Озарбайжон халқи ва давлатини ҳақорат қилган Давлат думаси депутати Валуев ҳақидаги сўзлари учун қора рўйхатга киритган, дея тахмин қилинмоқда.
Озарбайжон Ташқи ишлар вазирлиги буни қоралади
Вазирлик депутат аэропортда ушланганини тасдиқлаб, Бадамов айнан Астрахан вилояти вице-губернатори — ҳукумат раиси Денис Афанасевнинг таклифига биноан таклиф этилганини билдирди.
Делегация Бокудан Москвага учиб кетганига қарамай, Россия томони ҳеч қандай огоҳлантириш ёки хабарсиз депутат Азар Бадамовни Москва аэропортида ушлаб, унинг мамлакатга кириши тақиқланганини билдирган. Москва аэропортида бир муддат кутилганидан сўнг у юртимизга қайтарилган.
Ҳодиса муносабати билан зудлик билан Россиядаги элчихонамиз орқали Россия Ташқи ишлар вазирлиги билан алоқа ўрнатилди, Россия ТИВ вакили масала ўрганиб чиқилишини айтди, бироқ бу қарорнинг сабаблари ҳақида тушунтириш бермади.
Биз Россия томонининг ушбу қарорини нодўстона қадам деб ҳисоблаймиз ва Россия томонидан ушбу масала бўйича асосли тушунтиришларни кутамиз, дейилади Озарбайжон ТИВ баёнотида.
Москва ҳолат юзасидан оммага расмий муносабат билдирмаган.
Изоҳ (0)