Шавкат Мирзиёев 7 апрель куни Парламентлараро иттифоқнинг 150-aссамблеяси доирасида Ўзбекистонда бўлиб турган Беларусь Миллий Мажлиси республика кенгаши раиси Наталя Кочановани қабул қилди.
Президент матбуот хизматининг маълум қилишича, учрашув аввалида Беларусь делегацияси раҳбари Ўзбекистон етакчисига президент Александр Лукашенконинг саломи ва энг эзгу тилакларини етказди.
Кўп қиррали Ўзбекистон—Беларусь муносабатларини янада кенгайтириш масалалари кўриб чиқилди. Товар айирбошлаш ҳажми жадал ортиб бораётгани, саноат ва қишлоқ хўжалигида кооперация лойиҳалари муваффақиятли амалга оширилаётгани, ҳудудлар ўртасидаги ҳамкорлик самарали бўлаётгани, маданият, таълим ва соғлиқни сақлаш соҳаларидаги алмашинувлар фаоллашгани мамнуният билан қайд этилди.
Фаол парламентлараро мулоқотни давом эттириш, шу жумладан олий даражада эришилган келишувларнинг парламент назоратини таъминлаш ва ўз вақтида бажарилишига кўмаклашиш муҳим экани таъкидланди.
Шавкат Мирзиёев 7 апрель куни Тошкентда бўлиб ўтаётган Парламентлараро иттифоқнинг 150-юбилей ассамблеяси доирасида Озарбайжон Миллий Мажлиси раиси Соҳиба Гафаровани, Россия Федерал Мажлиси федерация кенгаши раиси Валентина Матвиенкони ҳам қабул қилди. Суҳбат давомида икки давлат ўртасидаги дўстлик, стратегик шериклик ва иттифоқчилик муносабатларини янада кенгайтириш ва мустаҳкамлашнинг масалалари кўриб чиқилди.
Парламентлараро иттифоқнинг 150-юбилей ассамблеяси
Парламентлараро иттифоқнинг 150-юбилей ассамблеяси 5 апрель куни Тошкент шаҳрида ўз ишини бошлади. 6 апрелда Парламентлараро иттифоқнинг 150-юбилей ассамблеясининг “Ижтимоий тараққиёт ва адолат учун парламент ҳаракати” мавзусидаги биринчи ялпи мажлиси бўлиб ўтди. 7 апрель куни Шавкат Мирзиёев Парламентлараро иттифоқнинг 150-юбилей ассамблеяси ялпи мажлисида нутқ сўзлади. Анжуманда 140 га яқин давлатдан 2 мингдан зиёд делегатлар қатнашмоқда. Ўз сафида 181 та миллий парламент ва 15 та минтақавий уюшмани бирлаштирган Иттифоқнинг ассамблеяси илк марта Марказий Осиё минтақасида бўлиб ўтмоқда.
Изоҳ (0)