Шавкат Мирзиёев 7 апрель куни Парламентлараро иттифоқнинг 150-юбилей ассамблеяси доирасида Туркия Буюк миллат мажлиси раиси Нуман Куртулмуш бошчилигидаги делегацияни қабул қилди. Бу ҳақда Президент матбуот хизмати хабар берди.
Учрашув аввалида Туркия парламенти раиси давлат раҳбарига президент Ражаб Тоййиб Эрдўғоннинг саломи ва тилакларини етказди. Ўзбекистон билан Туркия ўртасидаги дўстлик ва кенг қамровли стратегик шериклик муносабатларини мустаҳкамлашнинг долзарб масалалари кўриб чиқилди.
Икки томонлама ҳамкорликда юксак даражага эришилгани қайд этилди. Ўзаро товар айирбошлаш ва инвестиция кўрсаткичлари ўсмоқда, муваффақиятли қўшма лойиҳа ва корхоналар сони, тўғридан тўғри парвозлар кўпаймоқда. Икки давлат ва халқни яқинлаштиришга қаратилган муҳим маданий тадбирлар ўтказилмоқда.
Парламентлараро алоқаларни янада ривожлантиришга, Ўзбекистон—Туркия шериклигининг янги кун тартибини шакллантириш, ҳудудлараро ҳамкорликни фаоллаштиришда, шунингдек, олий даражадаги келишувлар ижроси устидан назоратни таъминлашда дўстлик гуруҳларининг иштирокига алоҳида эътибор қаратилди.
Шавкат Мирзиёев 7 апрель куни Тошкентда бўлиб ўтаётган Парламентлараро иттифоқнинг 150-юбилей ассамблеяси доирасида Озарбайжон Миллий Мажлиси раиси Соҳиба Гафаровани, Россия Федерал Мажлиси федерация кенгаши раиси Валентина Матвиенкони, Беларусь Миллий Мажлиси республика кенгаши раиси Наталя Кочановани ҳам қабул қилди. Суҳбат давомида икки давлат ўртасидаги дўстлик, стратегик шериклик ва иттифоқчилик муносабатларини янада кенгайтириш ва мустаҳкамлашнинг масалалари кўриб чиқилди.
Парламентлараро иттифоқнинг 150-юбилей ассамблеяси
Парламентлараро иттифоқнинг 150-юбилей ассамблеяси 5 апрель куни Тошкент шаҳрида ўз ишини бошлади. 6 апрелда Парламентлараро иттифоқнинг 150-юбилей ассамблеясининг “Ижтимоий тараққиёт ва адолат учун парламент ҳаракати” мавзусидаги биринчи ялпи мажлиси бўлиб ўтди. 7 апрель куни Шавкат Мирзиёев Парламентлараро иттифоқнинг 150-юбилей ассамблеяси ялпи мажлисида нутқ сўзлади. Анжуманда 140 га яқин давлатдан 2 мингдан зиёд делегатлар қатнашмоқда. Ўз сафида 181 та миллий парламент ва 15 та минтақавий уюшмани бирлаштирган Иттифоқнинг ассамблеяси илк марта Марказий Осиё минтақасида бўлиб ўтмоқда.
Изоҳ (0)