Шавкат Мирзиёев 7 апрель куни Парламентлараро иттифоқнинг 150-ассамблеясида иштирок этиш учун мамлакатга келган Марказий Осиё мамлакатлари парламентлари делегациялари раҳбарларини қабул қилди.
Қўшма учрашувда Қозоғистон Парламенти Мажлиси раиси Ерлан Кошанов, Қирғиз Республикаси Жогорку Кенеши торағаси Нурланбек Турғунбек ўғли, Тожикистон Мажлиси Намояндагон раиси Файзали Идизода ва Туркманистон Мажлиси раиси Дунёгўзал Гулманова иштирок этди.
Юқори мартабали меҳмонлар Ўзбекистон президентига ўз мамлакатлари етакчиларининг саломи ва тилакларини етказди, минтақада илк бор ўтказилаётган ушбу халқаро тадбирнинг аҳамиятини алоҳида таъкидлади.
Қардош мамлакатлар ўртасидаги дўстлик, яхши қўшничилик, стратегик шериклик ва иттифоқчилик муносабатларини янада мустаҳкамлаш ва ривожлантириш масалалари кўриб чиқилди.
4 апрель куни Самарқанд шаҳрида ўтган “Марказий Осиё—Европа Иттифоқи” биринчи саммити ва Иқлим форумининг самарали натижалари юксак баҳоланди.
Олий ва юқори даражадаги фаол мулоқотлар қайд этилди. Яқинда минтақада ўтказилган учрашувлар, жумладан, чегараларни делимитация қилиш масалалари тўлиқ тартибга солингани ҳамда Хўжанд шаҳрида Ўзбекистон, Қирғизистон ва Тожикистон давлат чегараларининг туташ нуқтаси тўғрисидаги шартнома имзолангани тарихий аҳамиятга эга экани таъкидланди.
Кейинги йилларда минтақа мамлакатлари ўртасидаги товар айирбошлаш ҳажми кўп карра ошди, чегараолди савдо зоналари ташкил этилмоқда. Иқтисодиётнинг турли тармоқларида, шу жумладан мамлакатлар ҳудудларида кооперация лойиҳалари муваффақиятли амалга оширилмоқда. Маданият ва таълимда тадбирларга бой дастурлар рўёбга чиқарилмоқда.
Учрашувда мамлакатлар ва халқларни янада яқинлаштириш, қўшма кооперация ташаббуслари ва лойиҳаларини илгари суриш, ҳудудлараро алоқалар ва гуманитар алмашинувни кенгайтириш мақсадида парламентлараро мулоқотни, шу жумладан қўмиталар даражасида мустаҳкамлаш муҳим экани таъкидланди.
Шавкат Мирзиёев 7 апрель куни Тошкентда бўлиб ўтаётган Парламентлараро иттифоқнинг 150-юбилей ассамблеяси доирасида Озарбайжон Миллий Мажлиси раиси Соҳиба Гафаровани, Россия Федерал Мажлиси федерация кенгаши раиси Валентина Матвиенкони, Беларусь Миллий Мажлиси республика кенгаши раиси Наталя Кочановани ҳам қабул қилди. Суҳбат давомида икки давлат ўртасидаги дўстлик, стратегик шериклик ва иттифоқчилик муносабатларини янада кенгайтириш ва мустаҳкамлашнинг масалалари кўриб чиқилди.
Парламентлараро иттифоқнинг 150-юбилей ассамблеяси
Парламентлараро иттифоқнинг 150-юбилей ассамблеяси 5 апрель куни Тошкент шаҳрида ўз ишини бошлади. 6 апрелда Парламентлараро иттифоқнинг 150-юбилей ассамблеясининг “Ижтимоий тараққиёт ва адолат учун парламент ҳаракати” мавзусидаги биринчи ялпи мажлиси бўлиб ўтди. 7 апрель куни Шавкат Мирзиёев Парламентлараро иттифоқнинг 150-юбилей ассамблеяси ялпи мажлисида нутқ сўзлади. Анжуманда 140 га яқин давлатдан 2 мингдан зиёд делегатлар қатнашмоқда. Ўз сафида 181 та миллий парламент ва 15 та минтақавий уюшмани бирлаштирган Иттифоқнинг ассамблеяси илк марта Марказий Осиё минтақасида бўлиб ўтмоқда.
Изоҳ (0)