Украинада 11 кишини ўлдиришда айбдор деб топилган Ўзбекистон фуқароси умрбодга қамалди. Бу ҳақда мамлакат бош прокуратура офиси хабар берди.
Киевда 38 ёшли ўзбекистонлик қасддан одам ўлдириш ва босқинчилик ҳужумларини содир этганликда айбдор деб топилган. У 6 йил ичида саккиз нафар Украина фуқароси, ўзбекистонлик, литвалик ва грузияликни ўлдирган.
Қурбонлар орасида 35 ёшдан 81 ёшгача бўлган эркаклар ва аёллар бор. Қотил уларнинг ишончига кириб, мулоқот қилган, кейин эса бўғиб ёки тошбўрон қилиб, мол-мулкини ўғирлаган, дейилади хабарда.
Қўлга олиш тафсилотлари
Ўзбекистон фуқароси 2018—2024 йиллар оралиғида уч нафар аёл ва 8 нафар эркакнинг ўлимига сабаб бўлган. Унинг яна бир кишини ўлдиришга уриниши муваффақиятсиз тугаган.
Унинг қурбонлари асосан доимий яшаш жойига эга бўлмаган одамлар бўлиб, эркак улар билан танишиб, спиртли ичимликлар истеъмол қилиб, кейин ўлдирган. Уларнинг жасадлари топилган, аммо ўлим ҳолатлари ва сабабларини аниқлаш жуда қийин, дейди прокуратура.
Ўзбекистонлик 2024 йил январь ойида Голосеев туманида гул сотувчисини ўлдирганидан кейин қўлга олинган. У дўконга кириб, сотувчига 30 га яқин пичоқ билан зарба берган. Шундан сўнг аёлнинг тилла тақинчоқларини олиб, қочиб кетган. Қўлга олинганидан сўнг, хорижлик айбига иқрор бўлган ва бошқа жиноятлари ҳақида гапирган.
Эркак ўзининг ҳар бир қурбони ҳақида маълумот берган. Суд прокурорларнинг далилларини инобатга олиб, унга максимал жазо тайинлаган.
Жиноят ҳақида нималар маълум?
Ўзбекистон фуқароси 2018 йилда Харьковдаги бозорлардан бирида ишлаган, у ерда танишини болта билан ўлдириб, боши ва танасига 30 дан ортиқ зарба берган. У болта, ҳужжатлар ва телефонни печга ташлаб, марҳумнинг пулларини ўзлаштирган. Шундан сўнг ўзбекистонлик эркак Киевга жўнаб кетган.
2019 йил август ойида у “Демеевская” метро бекати яқинида аввалдан таниш бўлган уйсиз одам билан ичимлик ичган. Сўнгра уни қўл ва оёқлари билан уриб, бошига 8 марта тош билан зарба берган.
Ўша йилнинг сентябрь ойи бошида у доимий яшаш жойига эга бўлмаган эски танишини ерда ухлаб ётганини кўрган. Бир кун олдин улар ўртасида оғзаки жанжал бўлгани сабабли, маҳкум яқин атрофдан бетон бўлагини топиб, эркакнинг бошига урган. У олган жароҳатлари оқибатида вафот этган.
2020 йил январь ойида Оболон туманидаги уйнинг ертўласида уч эркак — ота ва унинг ўғиллари билан спиртли ичимлик ичганидан сўнг, маҳкум ҳаммани ухлаб ётганида шим камари билан навбатма-навбат бўғиб ўлдирган.
2021 йил июнь ойи охирида Святошинский туманида маҳкум фаррошга яқинлашиб, бошига зарба берган. Эркак ҳушини йўқотган, маҳкум уни ўлдирмоқчи бўлган, бироқ ёнида одамларни кўрган, шунинг учун пулни ўғирлаб, шаҳардан қочиб кетган.
2023 йил июнь ойида ўзбекистонлик “Бабий Яръ дараси ҳудудида танишиб, биргаликда спиртли ичимлик истеъмол қилгандан сўнг аёлни қўли билан бўғиб ўлдирган.
2023 йил июль ойи бошида “Почайна” метро бекати яқинида эркак ўз ватандоши билан танишган. Улар танишувни нишонлашга боришган, кейин маҳкум жабрланувчи ухлаётган чойшабнинг бир бўлагини олиб, қотиллик ўз жонига қасд қилишдек кўриниши учун ундан сиртмоқ ясаган.
Бир неча кун ўтгач, Оболон туманида у кейинги йўналиш бўйича ёрдам сўраган аёлни бўғиб ўлдирган.
2023 йил июль ойи ўрталарида Петропавловская Боршчаговкада маҳкум супермаркетда кекса эркак билан танишган, уни ташландиқ бино олдига олиб бориб, жинси мато билан бўғиб ўлдирган. Шундан сўнг марҳумнинг жасадини чиқинди билан кўмиб ташлаган.
Изоҳ (0)