Президент Шавкат Мирзиёев 19 декабрь куни Россия президенти Владимир Путин билан телефон орқали мулоқот қилди. Бу ҳақда Президент матбуот хизмати хабар берди.
Икки томонлама кун тартибидаги ҳамда минтақавий ташкилотлар доирасидаги кўп томонлама ҳамкорликнинг долзарб масалалари кўриб чиқилди.
Хавфсизликка таҳдид ва хатарларга қарши курашни кучайтириш мақсадида икки мамлакат махсус хизматлари ўртасидаги яқин ва самарали ҳамкорликни давом эттириш муҳимлиги қайд этилди.
Игор Кириллов ва унинг ёрдамчиси Илья Поликарповнинг ўлими
Россия ФХХга кўра, 17 декабрь куни генерал ва ёрдамчисининг ўлимига сабаб бўлган терактни амалга оширган шахс бомбани электр самокатга ўрнатган. Ўзбекистон фуқароси кузатув учун каршеринг машинасини ижарага олиб, унга Wi-Fi камерасини улаган. Тасвирлар эса Днепропетровскдаги теракт ташкилотчиларига узатилгани маълум қилинган.
Таъкидланишича, генерал ва ёрдамчиси подъезддан чиқиши ҳақида видеосигнал олингандан сўнг, Украина разведкаси масофадан туриб бомбани ишга туширишга кўрсатма берган.
“Қотиллик содир этган Ўзбекистон фуқаросига Украина махсус хизматлари томонидан 100 минг АҚШ доллари миқдорида мукофот пули ва Европа иттифоқига чиқиш ваъда қилинган”, дейилади Россия ФХХ баёнотида.
Қотилликда гумонланган ўзбекистонлик эркак Москва вилояти Балашиха туманидаги Черное қишлоғида қўлга олинган.
Ўзбекистоннинг Россиядаги элчихонаси ҳолат бўйича изоҳ бериб, давлат ҳуқуқ-тартибот идоралари билан алоқада бўлиб, ушбу воқеани содир этганликда гумон қилинган шахс ҳақидаги маълумотни аниқлаштираётганини айтганди.
Изоҳ (0)