Украина президенти Владимир Зеленский Россия Қуролли кучлари “Пасха сулҳи” пайтида оғир қуроллардан кўпроқ фойдалана бошлаганини айтди. Сутка бошидан бери 46 та ҳужум ва 901 та отишма қайд этилди. Украиналик ҳарбийлар пистирмага тушди.
Зеленскийнинг сўзларига кўра, 448 та отишмада оғир қуроллардан фойдаланилган. Россия томонидан энг кўп жанговар ҳаракатлар Покровский, Курск, Северский ва Донецк вилоятидаги йўналишларда қайд этилган.
Торецк йўналишида жангчиларимиз, афсуски, Россия пистирмасига тушиб қолишди. Ҳалок бўлганлар бор. Буни амалга оширган Россия ҳарбийлари йўқ қилинади, деди сиёсатчи.
У мудофаа кучлари жавоб зарбаси беришини, яъни “мутлақо кўзгудагидек” ҳаракат қилишини таъкидлади. Зеленский Пасха “урушнинг ягона манбаи ва унинг чўзилишининг сабаби Россия эканини исботлагани”ни қайд этди.
Биз тинчлик ва камида 30 кун давом этиши мумкин бўлган ўт очишни тўлиқ, сўзсиз ва адолатли тўхтатиш томон ҳаракатланишга тайёрмиз, аммо Россиядан бу борада ҳали ҳам жавоб йўқ. Фронтдаги вазият тинчлик ҳукм суриши учун Москвага босим ўтказиш ва оккупацион контингент ҳаракатларини ҳақиқий назорат қилиш кераклигини кўрсатмоқда, деди у.
Россия президенти Владимир Путин 19 апрель соат 18:00 дан 21 апрель тонги 00:00 гача Пасха сулҳини эълон қилди. Бироқ Украина президенти Владимир Зеленский сулҳга риоя қилинмаганини айтди. Хусусан, Россия ФПВ дронларидан фойдаланишни икки баробар оширгани таъкидланди. Украина президентининг сулҳни 30 кунга узайтириш таклифини Кремль маъқулламади.
Изоҳ (0)