Малайзия компанияси Ўзбекистонда ҳалол инсулин ишлаб чиқариш лойиҳасини амалга оширишга қизиқиш билдирмоқда. Бу ҳақда “Дунё” АА хабар берди.
Маълум қилинишича, Ўзбекистон элчиси Каромиддин Гадоев Малайзиянинг Pharmаniaga Berhad компанияси директори Зулкифли Жафар билан учрашув ўтказди. Унда Ўзбекистонда фармацевтика маҳсулотларини ишлаб чиқариш соҳасида ҳамкорлик қилиш истиқболлари муҳокама қилинди.
Зулкифли Жафар Малайзияда қандли диабет билан касалланган беморлар учун мазкур компания томонидан ҳалол стандартлари бўйича биринчилардан бўлиб инсулин дорисини ишлаб чиқариш йўлга қўйилгани ва мамлакат ҳукумати буюртмаси асосида давлат соғлиқни сақлаш муассасаларига етказиб берилаётганини маълум қилди.
Унинг айтишича, Малайзияда қандли диабет касаллиги мавжуд инсонларга инсулин дори воситаларини бепул тарқатиш тизими жорий этилган.
“Ўзбекистон Фармацевтика тармоғини ривожлантириш агентлиги билан ушбу компаниянинг бир неча турдаги дори воситаларини мамлакатимизда ҳамкорликда ишлаб чиқариш имкониятлари ўрганяпмиз. Хусусан, маҳаллий шериклар билан биргаликда Tashkent Pharma Park ҳудудида ҳалол инсулин ишлаб чиқариш лойиҳасини амалга ошириш ниятимиз бор”, деди у.
Дастлабки босқичда мамлакатдаги фармацевтика корхоналарининг мавжуд инфратузилмасидан фойдаланган ҳолда ҳалол стандартлари асосида дори воситаларини ишлаб чиқаришни йўлга қўйиш мақсадида Малайзиядан зарур технологияларни олиб келиш, кейинги босқичда эса ушбу бизнесга сармоя киритиш режалаштирилмоқда.
Маълумот учун, Pharmаniaga Berhad компанияси 1994 йилда ташкил этилган. Компания Малайзияда фармацевтика маҳсулотларини ишлаб чиқариш бўйича тўртта завод, тадқиқот маркази, логистика компанияси, шунингдек, сотиш ва маркетинг ҳамда тиббий маҳсулотлар ва хизматларни етказиб бериш бўйича 5 та корхонага эгалик қилади. Бундан ташқари, компаниянинг Индонезияда 3 та корхонаси бор.
Ўзбекистон Малайзия билан жиноий ишлар бўйича ҳуқуқий ҳамкорлик қилади.
Шавкат Мирзиёев Малайзия бош вазири Анвар Иброҳимнинг таклифига биноан 4 февраль куни кечқурун расмий ташриф билан ушбу мамлакатга борганди. Президент аэропортда Малайзия парламенти спикери билан учрашув ўтказган. Бўлажак олий даражадаги учрашувлар кун тартиби юзасидан фикр алмашилган.
Ташқи савдо
Йил бошидан буён Ўзбекистон ва Малайзия ўртасида ташқи савдо айланмаси 36 фоизга ошиб, салкам 20 млн АҚШ долларини ташкил қилди. Ўзбекистондан Малайзияга асосан мева-сабзавот, минерал ўғитлар экспорт қилинган бўлса, ушбу давлатдан Ўзбекистонга ўсимлик ёғилари, қаҳва, чой ва зираворлар, кимё саноати ва озиқ-овқат маҳсулотлари импорт қилинган.
Дронлар ишлаб чиқаришда ҳамкорлик
Куни кеча Ўзбекистон ва Малайзия ақлли қишлоқ хўжалиги технологиялари ва дронлар ишлаб чиқаришда амалий ҳамкорлик қилишга келишган эди.
Малайзия компаниялари Ўзбекистонда дронлар ишлаб чиқаришга қизиқиш билдираётгани ҳақида 2023 йилнинг апрелида маълум қилинганди. 2024 сентябрида Малайзиянинг етакчи робототехника етказиб берувчиси Мерақуэ Group компанияси ва Ўзбекистон Қишлоқ хўжалиги вазирлиги ўртасида ўзаро англашув меморандуми имзоланганди.
Ушбу компания келгуси уч йил ичида Ўзбекистонда мингта иш ўрни яратадиган ва 100 минг гектар қишлоқ хўжалигига хизмат кўрсатадиган ишлаб чиқариш корхонасини ташкил этиш учун 20 миллион Малайзия ринггити сармоя киритмоқчи. Компания, шунингдек, минтақадаги технологик такомиллаштириш учун қўшимча 30 миллион ринггит йиғмоқчи.
2018 йилда ташкил топган Мерақуэ компанияси кенг турдаги дронлар ва улар учун дастурий таъминот ишлаб чиқариш, робототехникага ихтисослашган. Компания Вьетнам, Камбоджа, Филиппин, Лаос ва Покистонда фаолият юритади.
Изоҳ (0)