Ўзбекистон ва Малайзия ўртасида ташқи савдо айланмаси йил бошидан буён 36 фоизга ошди, деб хабар бермоқда Божхона қўмитаси раисининг матбуот котиби.
Унда айтилишича, Божхона қўмитаси раиси бошчилигидаги делегация Малайзияга ишчи ташрифни амалга оширди. Куала Лумпур шаҳрида ташрифнинг асосий воқелиги — Малайзия қироллик божхона департаменти бош директори билан учрашув ўтказилди.
5 февраль куни Шавкат Мирзиёевнинг Малайзияга олий даражадаги ташрифи доирасида, иккала давлат ўртасида божхона соҳасидаги ҳамкорликни мустаҳкамлашга қаратилган битим имзоланди. Ўзбекистон ва Малайзия божхона хизмати тарихида илк бор юқори даражада ўтказилаётган мазкур учрашув эса бу йўналишдаги амалий чора-тадбирларнинг мантиқий давоми бўлди.
Таъкидланишича, мамлакатлар ўртасидаги савдо муносабатлари кундан кунга мустаҳкамланиб, ўзаро алоқалар янада ривожланиб бормоқда. Йил бошидан буён Ўзбекистон ва Малайзия ўртасида ташқи савдо айланмаси 36 фоизга ошиб, салкам 20 млн АҚШ долларини ташкил қилди.
Ўзбекистондан Малайзияга асосан мева-сабзавот, минерал ўғитлар экспорт қилинган бўлса, ушбу давлатдан Ўзбекистонга ўсимлик ёғилари, қаҳва, чой ва зираворлар, кимё саноати ва озиқ-овқат маҳсулотлари импорт қилинган.
Учрашувда асосий эътибор ўзаро ҳамкорлик истиқболлари ва йўналишларини белгилаб олиш, божхонани рақамлаштириш ва сунъий интеллектни қўллаш бўйича ўзаро тажриба алмашиш, божхона ходимлари учун турли ўқув малака ошириш курсларини ташкил қилиш масалаларига қаратилди.
Божхона қўмитаси раиси Божхона институти билан Малайзия қироллик божхона академияси ўртасида фаол алоқаларни йўлга қўйиш, Ўзбекистонда малайзиялик сайёҳлар учун зиёрат туризмини янада ривожлантириш, кинология соҳасида ҳамкорликни йўлга қўйиш, келгусида ваколатли иқтисодий операторларни ўзаро тан олиш каби таклифларни илгари сурди.
Учрашувда Малайзия божхона хизмати раҳбари Ўзбекистонга таклиф қилинди. Томонлар учрашув якунлари бўйича қатор ҳужжатларни имзолади.
Шавкат Мирзиёев Малайзия бош вазири Анвар Иброҳимнинг таклифига биноан 4 февраль куни кечқурун расмий ташриф билан ушбу мамлакатга борган эди. Президент аэропортда Малайзия парламенти спикери билан учрашув ўтказган. Бўлажак олий даражадаги учрашувлар кун тартиби юзасидан фикр алмашилган.
5 февраль куни Куала-Лумпур шаҳридаги “Пердана Путра” ҳукумат мажмуасида 5 февраль куни Шавкат Мирзиёевни расмий кутиб олиш маросими бўлиб ўтган. Маросимдан сўнг олий даражадаги музокаралар ўтказилган.
Изоҳ (0)