Қийинчиликларга қарамай, ўз ишини бошлаётган, ўзига ишонган ва муваффақият сари интилаётган аёллар жамиятимизнинг муҳим таянч кучидир. Уларнинг қатъияти нафақат оилалар фаровонлигини оширишга, балки бутун мамлакат тараққиётига ҳисса қўшишга хизмат қилади.
Ўзбекистон президентининг аёллар тадбиркорлигини қўллаб-қувватлаш сиёсати доирасида “Ҳамроҳ” дастури ишга туширилди. Ўзбекистон президенти ёрдамчиси Саида Мирзиёева ушбу ташаббус аёлларга бизнес юритиш бўйича зарур билимларни олиш, тажрибали мураббийлардан маслаҳат олиш ҳамда имтиёзли кредитлар ва грантлардан фойдаланиш имкониятини яратиши ҳақида эълон қилди.
“Ҳамроҳ” дастуридан руҳланиб, янада олға интилаётган Гулмира Джумаева болалигида ишчилар учун чалоб сотгани, бир неча йил муҳожирликда қийналгани ва бугунги кунда қандай қилиб катта тадбиркорга айлангани ҳақида ҳикоя қилди.
“Одамларга чалоб сотиб катта бўлганман”
— Болалигимда мен яшайдиган жой — Каттақўрғон туманида поезд йўлида ишчилар учун бозор бўларди. Ёш бўлишимга қарамай, чалоб тайёрлаб келиб, ўша ерда сотардим. Дадам оилада етти кишини бир ўзи боқарди.
Россияда кўча супурган пайтларим ҳам бўлган. Чўнтагимга озгина нон солиб, чой дамлаб олардим. Йўлнинг бир чеккасига ўтириб овқатланардим. У нарсаларни эслаш жуда оғир, оила соғинчи…
Қариндош-уруғларим, дўстларим сен чиқинди билан ишлаяпсан, яхши иш қилмаяпсан деб мендан хафа бўларди. Шундан сўнг тўй-маърака, йиғинларга ҳам бормаганман. Мени таклиф қилишганда ҳам рад этардим. Одамлар устимда кулар, ҳатто қўли билан мени кўрсатишарди, дея ҳикоя қилади у.
“Бугун қўл остимда юзлаб инсонлар ишлайди”
— Чет элда ишлаётганлар у ердан ғоялар олиши керак. Тажрибаларни Ўзбекистонга олиб келишса, бажариш бизнинг одамларнинг қўлидан келади. Фақат ўша касбни ўрганиш керак. Нима учун мен меҳнат муҳожири бўлиб юрибман-у, нега энди Ўзбекистонга бориб шу ютуқни қилолмас эканман? Улар минган машинани нега мен минолмайман, деган саволларни ўзимга берганимда турмуш ўртоғим устимдан кулган пайти ҳам бўлган. Менинг шу саволларим бугунги ютуғимнинг эгаси бўлди.
Ҳозир чиқиндини қайта ишлаш билан шуғулланаман. Бугунги кунда шу соҳада учта туман кластериман. Чиқиндилар қайта ишланса — улар Ўзбекистоннинг бойлиги. Қўл остимда 426 нафар инсон фаолият юритади. Улардан 123 таси “темир дафтар”да турадиган, имконияти чекланган аёллар. Ишчиларим билан битта столда ўтириб овқатланишни яхши кўраман — тушликда улар билан бир столда ўтираман. Уларнинг дардини, қандай муаммоси борлигини эшитаман, дейди Гулмира Джумаева.
“Пул осонлик билан келмайди, ортга чекинмаслик лозим”
— Ҳозир Каттақўрғон шаҳрида ҳам, туманда ҳам бирорта чиқинди кўрмайсиз. Битта тушган чиқинди дарҳол йиғиштириб кетилади ва бизнинг заводга етказилади. Бугун оддий шишани қайта ишлайман — дробилка орқали майдалаб, йиғиб, етказиб бераман. Металлни қайта ишлашда ксероксдан фойдаланаман. Барча пластмассани қайта ишлаб, гранула тайёрлайман. Қоп, металл ва пластикни қайта ишлайман. Етти хил турдаги қайта ишлайдиган маҳсулотларим бор.
Аёллар бугунги кунда қийинчиликдан ортга чекинмасликлари керак. Хотин-қизларга бугун жуда кенг имконият ва шароитлар бор. Пул ўз-ўзидан келиб қолмайди. Қийинчиликни сабр билан енгса албатта, ҳаммаси ўз ўрнига тушади. Орқага чекинмаслик лозим — ишлаш керак. Бугун зиён қилса, эртага фойда қилади. Агар эртага ҳам зиён бўлса, индинга албатта, фойда кўради, дейди тадбиркор.
“Ҳамроҳ” менинг олға интилишимга куч беряпти”
— Бошланишидаги барча қийинчиликларни оилам билан биргаликда енгиб ўтдим, уларни ҳам тўғри ишларга йўналтирдим. Бугун эримнинг оиласи ҳам, ўзимнинг опа-сингил, укаларим — ҳаммаси яхши яшайди. Барчасининг “иномарка” машинаси бор.
Ҳозирда Ўзбекистонимизда ҳамма шароит бор! Менда “Шу қийинчиликлардан ўтиб олсам, барчаси яхши бўлиб кетади” деган гап хаёлимда турарди. Ёцам ҳам, турсам ҳам шу ҳақида ўйлардим. Ўша қийинчиликларга чидадим, сабр қилдим — мана бугун роҳатини кўряпман.
Шундай вақт бўлди-ки, озроқ қийналиб турган пайтимда 500 миллион кредит сўрадим. Халқ банки томонидан менга шу сумма ажратиб берилди. “Ҳамроҳ” эса мендан қийинчилик, менга қандай ёрдам берилса яна мингта иш ўрни яратилишини сўради. “Ҳамроҳ”дек ташкилотлар янада олдинга юришимга руҳан куч беряпти, дейди чиқиндини қайта ишлаш корхонаси раҳбари Гулмира Джумаева.
Изоҳ (0)