Малайзия билан жиноий ишлар бўйича ўзаро ҳуқуқий ҳамкорлик қилинади, деб хабар бермоқда Адлия вазирлиги.
Унга кўра, президент томонидан имзоланган қонун билан Ўзбекистон ҳукумати билан Малайзия ҳукумати ўртасида жиноий ишлар бўйича ўзаро ҳуқуқий ёрдам тўғрисидаги шартнома (Тошкент, 2023 йил 8-июнь) ратификация қилинди.
Шавкат Мирзиёев Малайзия бош вазири Анвар Иброҳимнинг таклифига биноан 4-февраль куни кечқурун расмий ташриф билан ушбу мамлакатга борганди. Президент аэропортда Малайзия парламенти спикери билан учрашув ўтказган. Бўлажак олий даражадаги учрашувлар кун тартиби юзасидан фикр алмашилган.
5-февраль куни Куала-Лумпур шаҳридаги “Пердана Путра” ҳукумат мажмуасида 5-февраль куни Шавкат Мирзиёевни расмий кутиб олиш маросими бўлиб ўтган. Маросимдан сўнг олий даражадаги музокаралар ўтказилган.
Ташқи савдо
Йил бошидан буён Ўзбекистон ва Малайзия ўртасида ташқи савдо айланмаси 36 фоизга ошиб, салкам 20 млн АҚШ долларини ташкил қилди. Ўзбекистондан Малайзияга асосан мева-сабзавот, минерал ўғитлар экспорт қилинган бўлса, ушбу давлатдан Ўзбекистонга ўсимлик ёғилари, қаҳва, чой ва зираворлар, кимё саноати ва озиқ-овқат маҳсулотлари импорт қилинган.
Дронлар ишлаб чиқаришда ҳамкорлик
Куни кеча Ўзбекистон ва Малайзия ақлли қишлоқ хўжалиги технологиялари ва дронлар ишлаб чиқаришда амалий ҳамкорлик қилишга келишган эди.
Малайзия компаниялари Ўзбекистонда дронлар ишлаб чиқаришга қизиқиш билдираётгани ҳақида 2023 йилнинг апрелида маълум қилинганди. 2024 сентябрида Малайзиянинг етакчи робототехника етказиб берувчиси Meraque Group компанияси ва Ўзбекистон Қишлоқ хўжалиги вазирлиги ўртасида ўзаро англашув меморандуми имзоланганди.
Ушбу компания келгуси уч йил ичида Ўзбекистонда мингта иш ўрни яратадиган ва 100 минг гектар қишлоқ хўжалигига хизмат кўрсатадиган ишлаб чиқариш корхонасини ташкил этиш учун 20 миллион Малайзия ринггити сармоя киритмоқчи. Компания, шунингдек, минтақадаги технологик такомиллаштириш учун қўшимча 30 миллион ринггит йиғмоқчи.
2018 йилда ташкил топган Meraque компанияси кенг турдаги дронлар ва улар учун дастурий таъминот ишлаб чиқариш, робототехникага ихтисослашган. Компания Вьетнам, Камбоджа, Филиппин, Лаос ва Покистонда фаолият юритади.
Изоҳ (0)