Тошкентнинг икки туманида автоматик ҳаво мониторинги станциялари ўрнатилди, деб хабар бермоқда Экология вазирлиги.
Қайд этилишича, Экология, атроф-муҳитни муҳофаза қилиш ва иқлим ўзгариши вазирлиги ҳамда “Замин” халқаро жамоат фонди томонидан Тошкент шаҳрининг Яшнобод ва Олмазор туманларида 2 та автоматик ҳаво мониторинги станцияси ўрнатилди ва ишга туширилди.
Бу “Атмосфера ҳавоси ифлосланиши мониторингини автоматлаштириш” лойиҳаси доирасида амалга оширилди. Ўрнатилган станциялар ҳаво ифлосланишини юқори даражадаги аниқликда ўлчаш бўйича патентланган технологияларга эга.
Таъкидланишича, автоматик станцияларни ўрнатиш жойини танлаш турли омилларга боғлиқ. Улар орасида аҳоли зич жойлашган ҳудудлар, асосий йўллар ва транспорт магистраллари, муҳофаза қилинадиган табиий ҳудудлар муҳим ўрин тутади. Бу ўз навбатида аҳоли турмуш сифатини яхшилаш ва атроф-муҳитни муҳофаза қилиш бўйича қарорлар қабул қилиш учун аниқ маълумотлар тўплаш ва улардан самарали фойдаланиш имконини беради.
Станциялар сонининг кўпайиши, албатта бу борада малакали кадрларни талаб қилади. Шунинг учун ҳам Гидрометеорология агентлиги ходимлари станциялардан келаётган маълумотларни таҳлил қилиш, шунингдек, ускуналар ва дастурий таъминотдан фойдаланиш бўйича мунтазам равишда ўқитилмоқда.
Жаҳон соғлиқни сақлаш ташкилоти ҳисоб-китобларига кўра, ҳаво ифлосланиши туфайли ҳар йили 7 миллионга яқин одам вафот этади. Глобал иқлим ва соғлиқни сақлаш альянси компанияси раҳбари Швета Нараянинг айтишича, юқори ифлосланиш даражасини қайд этган ҳудудлар кўмир, нефть ва газдан энг кўп фойдаланиши маълум бўлди.
Чангли ҳавода нима қилиш керак?
Санепидқўмитанинг чангли ҳавода қилиш керак бўлган қатор тавсиялари қуйидагилардан иборат:
- Кўчага иложи борича камроқ чиқиш;
- Ишга, ўқишга, харид учун кўчага чиққанда тиббий ниқоб тақиш ва ҳар 2 соатда алмаштириш;
- Кўчадан уйга қайтгач душ қабул қилиш (соч ва юз-кўзларни яхшилаб ювиш);
- Калит, кўзойнак, телефон ва сумкани намланган салфетка билан яхшилаб артиш;
- Кўчага кийиб чиққан кийимларни ювиш;
- Устки кийимларни (костюм, плаш, палто ва бошқалар) маска таққан ҳолда ташқарида яхшилаб қоқиш;
- Ним таъсир этувчи тузли сув билан томоқ ва бурунларни тез-тез чайиш;
- Кўпроқ суюқлик (илиқ) ичиш, иложи бўлса кўк чой, наъматак дамламасини ичиш;
- Ёғли, қовурилган, дудланган, тузланган, шўр, аччиқ таомларни чеклаш;
- Суюқ сабзавотли таомлар, сут ва сут маҳсулотлари (қатиқ, кефир ва бошқалар), кўкатларни истеъмол қилиш;
- Чанг кўп тўпланишининг олдини олиш ва уйни ҳамда юзаларни тўғри тозалаш керак;
- Уй, ишхона ва машина эшиклари ва деразаларини зич ёпиш;
- Чанг йиғилиши мумкин бўлган ҳамма нарсаларни чангютгич ёрдамида тозалаш керак (ковролин, гилам, юмшоқ мебел, юмшоқ ўйинчоқлар ва бошқалар). Юмшоқ мебелни қоқишдан аввал усти намланган латта билан ўралиши тавсия этилади.
- Чанг йиғилиши мумкин бўлган барча юзаларни (пол, шкаф, ишчи юзалар ва бошқалар) кун давомида бир неча марта намланган латта билан яхшилаб артиш керак;
- Оёқ кийимларни эшик олдида қолдириш ва имкон қадар тезроқ ювиб қўйиш керак;
- Хона ҳавоси оптимал намлигини таъминлаш: ҳўл сочиқларни хоналарга осиш, каттароқ сиғимли идишларга сув солиб қўйиш.
Изоҳ (0)