Ko‘pchilik choyga limon qo‘shib ichishni sog‘liq uchun foydali deb hisoblaydi — bu immunitetni mustahkamlashi, shamollashdan himoya qilishi va tetiklantirishi mumkin, degan fikr keng tarqalgan. Ammo mutaxassislar bu odat har doim ham foyda keltirmasligini, ayrim hollarda esa sog‘liq uchun xavfli bo‘lishi mumkinligini ta’kidlashmoqda. Quyida limonli choy ichishning ehtimoliy salbiy oqibatlari haqida so‘z yuritamiz.
Tishlarni yemiradi
Limon C vitaminiga boy bo‘lib, bu tish va milklar uchun foydali. Biroq stomatologlar haddan ortiq limonli choy ichish tishlarga zarar yetkazishidan ogohlantirishmoqda. Stomatolog shifokor Galina Guryanovaning tushuntirishicha, har qanday kislotali ichimlik tish emaliga salbiy ta’sir ko‘rsatadi:
Tadqiqotlarga ko‘ra, kislotali ichimliklar tish emalini yemiradi. Ichimlikdagi kislota darajasi qanchalik yuqori bo‘lsa, tish salomatligi uchun shunchalik zararli bo‘ladi. Limon sharbatining kislotalilik darajasi (pH) 2-3 atrofida, issiq suv esa bu ta’sirni kuchaytiradi. Limonli choy tishlarga hatto gazlangan ichimliklarga qaraganda ko‘proq zarar yetkazadi, deydi doktor.
Shuning uchun stomatologlar limonli choy ichgach, og‘izni suv bilan chayishni tavsiya qiladi.
Oshqozon-ichak kasalliklari bo‘lganlarga xavfli
Limonli choy sitrus mevalarga allergiyasi borlar hamda oshqozon kislotaliligi yuqori bo‘lgan odamlarga tavsiya etilmaydi. Homilador ayollar ham, ayniqsa, ko‘ngil aynishi yoki jig‘ildon qaynashidan aziyat cheksa, undan voz kechishlari kerak. Limon kislotasi oshqozon shilliq qavatini bezovta qiladi. Shuningdek, bu ichimlikni o‘t pufagi toshlari, gastrit, oshqozon yarasi kasalligi mavjud bo‘lganda tavsiya etilmaydi.
Och qoringa ichish mumkin emas
Limonli choyni och qoringa ichish tavsiya etilmaydi. Undagi mevali kislota oshqozon shirasi bilan reaksiyaga kirishib, jig‘ildon qaynashiga olib keladi. Yana bir jihat: choydagi kofein oshqozonda tuz kislotasi ajralishini kuchaytirib, tez-tez iste’mol qilinsa, devorlarining yallig‘lanishiga sabab bo‘ladi.
Choy turlari haqida qiziqarli ma’lumot
Choy faqat ko‘k yoki qora bo‘ladi, degan tasavvur keng tarqalgan. Aslida esa, choy barglarining qay darajada fermentatsiyadan o‘tganiga qarab olti asosiy turga bo‘linadi: qora, yashil, oq, puer, ulun va sariq choy.
- Qora choy to‘liq fermentatsiyalangan bo‘lib, eng kuchli ta’m va rangga ega.
- Ko‘k choy esa deyarli fermentatsiyalanmagan, eng ko‘p antioksidant saqlovchi choy turidir.
- Oq choy — eng nozik va eng kam ishlov beriladi, uni maxsus sharoitda quritishadi.
- Ulun — yarim fermentatsiyalangan choy bo‘lib, qora va yashil choy orasidagi “oltin o‘rta” hisoblanadi.
- Puer — maxsus fermentatsiyadan o‘tgan, yillar davomida yetilishi mumkin bo‘lgan choy. Uning ta’mi vaqt o‘tgan sayin boyiydi.
- Sariq choy esa eng noyob turlardan biri bo‘lib, o‘ziga xos mayin ta’mga ega va asosan Xitoyda ishlab chiqariladi.
Har bir choy turi nafaqat ta’mi bilan, balki sog‘liqqa ta’siri bilan ham farqlanadi. Masalan, ulunlar ko‘p miqdorda antioksidant saqlaydi, puerlar esa yog‘ yo‘qotishga yordam berishi mumkin.
Izoh (0)