Ўзбекистон терма жамоаси ва “Рома” клуби ҳужумчиси Элдор Шомуродов римликлар билан шартномасини узайтиришга розилик билдирди. Бу ҳақда Calciomercato нашри хабар бермоқда.
Манбага кўра, футболчи клуб билан амалдаги шартномани яна бир йилга — 2027 йилгача узайтиришга келишиб олган. Эътиборлиси, Шомуродов Рим клуби таркибида қолиш учун маоши камайишига рози бўлган. Маош миқдори ҳозирча ошкор этилмаган.
Жорий мавсумда Элдор “Рома” сафида барча мусобақаларда 30 та ўйинда майдонга тушиб, ўз ҳисобига 6 та гол ва 3 та голли узатмани ёздириб қўйган. Унинг амалдаги шартномаси 2026 йил ёзигача мўлжалланган. Transfermarkt ҳужумчининг қийматини 4 миллион еврога баҳоламоқда.
Маълумот учун, футболчи 2021 йилнинг ёзида “Женоа”дан 18 миллион евро эвазига римликлар сафига ўтган эди. У клубда ўзини тўлиқ намоён эта олмади. Шу боис бир қанча вақт “Специя” ва “Кальяри” сафида ижара асосида ўйнади.
Изоҳ (0)