Футбол бўйича Жаҳон чемпионати саралашининг 3-босқичи 7-туридан ўрин олган Ўзбекистон – Қирғизистон учрашувидан сўнг матбуот анжумани ташкил этилди.
Унда Ўзбекистон МТЖ бош мураббийи Темур Кападзе ўз фикрларини билдириб ўтди.
Аввало барча ҳамюртларимизни Наврўз байрами билан табриклайман. Бугун ғалаба қозондик. Балки кўпроқ гол уриб, яна-да чиройлироқ ғалаба қозонсак бўларди. Бироқ муҳими ғалаба эди. Балки эртароқ гол уриб олганимизда ҳисоб бошқача бўларди. Рақиблар ҳам яхши ҳимояланди. Энди биз кейинги ўйинга тайёрланамиз, дейди Кападзе.
Мураббий ўйин олдидан Катанецдан ҳам ёрдам сўраган ва Шомуродов паст баҳо олгани ҳақида сўралган саволга шундай жавоб берди:
Барчаси жойида. Ёрдамчиларим менинг ёрдамчиларим, Катанецники эмас. Ўйинга яхши тайёргарлик кўрдик. Ўйинда биз кутгандек ўзгаришлар бўлди. Қизил карточкадан кейин эса кўп нарсалар ўзгариб кетди. Рақиблар ҳам очко учун курашишларини билардик. Бироқ биз ўз уйимизда ўйнаётганимиз учун уларга имконият қолдирмай ғалаба қозонишимиз керак эди. Балки рақиблар 11 киши бўлиб қолганида бизга осонроқ бўларди. Биринчи ва иккинчи бўлимда ҳам кўплаб вазиятларга эга бўлдик. Балки голларни кейинги ўйинларга олиб қўйгандирмиз, муҳими натижага эришдик.
Кападзе пенальтилардан фойдаланилмаётганлиги ҳақидаги саволга ҳам жавоб бериб ўтди. Мураббий охири ўзи чиқиб пенальти тепишини айтиб, ҳазил қилди.
Барча футболчилар машғулотлардан кейин қўшимча ишлашяпти. Элдор бошқа бурчакка ҳам тепиши мумкин эди. Яхши тепди ҳам, дарвозабон олиб чиқди. Буни камроқ муҳокама қилиш керак деб ўйлайман, деган Кападзе.
Изоҳ (0)