Роберт Де Ниро Канн кинофестивалининг фахрий “Олтин палма новдаси” мукофотига сазовор бўлади. Бу ҳақда “Правила жизни” хабар берди.
Актёр жаҳон кинематографиясини ривожлантиришга қўшган улкан ҳиссаси учун 13 май куни фестивалнинг очилиш маросимида мукофотланади. Де Ниро 2011 йилда ҳакамлар ҳайъати раиси бўлганидан 14 йил ўтгач, ҳайкалчани олади.
Фестивал ташкилотчилари актёрни “кинематография афсонаси” деб атади ва унинг экран дебюти Нью Йоркнинг тарихий авлоди режиссёрларининг тақдирини белгилаганини таъкидлади.
“Мен Канн кинофестивалини жуда яхши кўраман. Айниқса, ҳозирги пайтда дунёда содир бўлаётган кўп нарсалар бизни ажратиб турган бир пайтда. Канн, ўз навбатида, ҳикоячиларни, кинорежиссёрларни, мухлисларни ва дўстларни бирлаштиради. Бу уйга қайтиш каби”, деди Де Ниро ушбу воқелик ҳақида.
78-Канн кинофестивали 13—24 май кунлари ўтказилади. Ҳакамлар ҳайъати раиси француз актрисаси Жюлет Бинош бўлади.
Олдинги йилларда фахрий “Олтин палма новдаси” мукофотига Мерил Стрип, Жорж Лукас, Катрин Денев, Ҳаррисон Форд, Том Круз, Жоди Фостер ва бошқалар сазовор бўлишган. Мукофотнинг биринчи соҳиби 1997 йилда швед режиссёри Ингмар Бергман бўлган.
Изоҳ (0)