Коррупцияга қарши курашиш агентлиги 2024 йилдаги давлат ташкилотларининг коррупцияга қарши кураш рейтингини эълон қилди.
Рейтинг баҳолаш тизими бўйича 103 та давлат ташкилотининг (жумладан, 14 таси илк маротаба, 89 таси эса такроран) 2024 йилдаги фаолияти 0 баллдан 100 баллгача рейтингда баҳолашдан ўтказилди. Унга кўра, давлат ташкилотлари фаолиятининг самарадорлиги қуйидаги тоифаларга ажратилди:
- 41 таси “яхши” — (81—100 балл);
- 53 таси “қониқарли” — (55—80 балл);
- 9 таси “қониқарсиз” — (55 баллдан паст).
Рейтинг натижалари ўртача 73,8 баллни ташкил этиб, 2023 йилга нисбатан 4,9 баллга (95 та давлат ташкилоти томонидан ўртача 68,9 балл), 2022 йилга нисбатан эса 14,3 баллга (62 та давлат ташкилоти томонидан 59,5 балл) ошган.
Коррупцияга қарши курашиш агентлиги томонидан эълон қилинган баҳолаш натижаларига кўра энг юқори кўрсаткичлар:
- “Навоий кон-металлургия комбинати” АЖ — 96 балл;
- Тоғ-кон саноати ва геология вазирлиги — 95 балл;
- Марказий банк — 94 балл.
Энг паст натижалар:
- Агросаноатни ривожлантириш агентлиги — 9 балл;
- Ғазначилик хизмати қўмитаси — 17 балл;
- Фармацевтика тармоғини ривожлантириш агентлиги — 26 балл.
Ўзбекистондаги давлат хизматчиларида коррупцияга нисбатан муросасиз муносабатни шакллантириш, уларга “ҳалоллик вакцинаси”ни сингдириш ҳамда бу борада превентив механизмларни жорий этиш мақсад қилинган. Бу жамоатчилик муҳокамасига қўйилган 2025 йилга мўлжалланган давлат дастури лойиҳасида кўзда тутилган.
Ўзбекистонда давлат хизматчиларининг коррупцияга мойиллигини текшириш амалиётини жорий қилиш таклиф этилаётгани ҳақида аввалроқ Коррупцияга қарши курашиш агентлиги директори Акмал Бурҳонов маълум қилганди.
Изоҳ (0)