АҚШ президенти Жо Байден Беларусь ҳукуматининг қатор аъзоларига нисбатан санкцияларни бир йилга узайтирди, чекловлар 2023 йил 16 июндан кейин ҳам амал қилади, деб хабар берди Оқ уй матбуот хизмати.
“Беларусь ҳукуматининг айрим аъзолари ва бошқа мансабдорларнинг ҳаракатлари ва сиёсати, шунингдек, Беларусь режимининг зарарли фаолияти ва узоқ йиллардан бери ўз ваколатларини суиистеъмол қилиши АҚШ миллий хавфсизлиги ва ташқи сиёсатига ғайриоддий ва фавқулодда хавф туғдиришда давом этмоқда”, — дейди Байден ўз баёнотида.
Оқ уй Беларусга қарши илк санкциялар 2006 йилда, ўша йили бўлиб ўтган “нодемократик сайловлар”, инсон ҳуқуқларининг бузилиши, “сиёсий репрессия” ва коррупция муносабати билан киритилганини эслатди. 2006 йилда Вашингтон, бошқалар қаторида, Беларусь президенти Александр Лукашенкога (ўшанда у учинчи марта давлат раҳбари лавозимини эгаллади) қарши санкциялар киритган.
2021 йилда Вашингтон 2020 йил августида бўлиб ўтган президентлик сайловларидан сўнг (ўшанда Лукашенконинг навбатдаги ғалабасидан кейин Беларусда норозилик намойишлари бўлиб ўтган) республика ҳукуматига қарши санкцияларни кенгайтирди. Ўша йили чекловлар Беларусь расмийлари ва давлат идоралари, энергетика ва молия ташкилотлари ва уларнинг раҳбарларига таъсир кўрсатди. Беларусь президенти Ғарб давлатлари жорий этган санкцияларни изоҳлар экан, уларни “бандитларча” деб атаган
Бироқ 2023 йил январида у АҚШ ва Ғарб давлатларига санкциялар учун “миннатдорлик” билдиришга қарор қилди.
“Америкаликлар ва бутун Ғарб дунёсига бизга қарши санкциялар қўйгани учун миннатдорлик билдирмоқчиман. Акс ҳолда бу улкан майдонда Беларусь тракторлари эмас, Америка ва Германия тракторлари турган бўларди”, — деди Лукашенко Зимбабве раҳбариятига Беларусь техникасини топшириш маросимида.
Изоҳ (0)