Ҳиндистон ҳукумати мусулмонларга тегишли вақф ерларини бошқариш тартибини ўзгартирмоқчи. Бу борадаги қонун лойиҳаси парламентга тақдим этилди ва жамоатчилик орасида баҳс-мунозараларга сабаб бўлди. Бу ҳақда Reuters хабар берди.
Вақф мулклари мусулмонлар томонидан диний, маърифий ёки хайрия мақсадларида фойдаланилади. Бундай ер ва биноларни сотиш ёки бошқаларга бериш тақиқланган. Ҳукумат маълумотларига кўра, Ҳиндистондаги 25 дан ортиқ вақф кенгашлари 85 1535 та мулк ва 900 минг акр ерни бошқаради. Бу кўрсаткичлар уларни мамлакатнинг энг йирик ер эгалари қаторига киритади.
Бош вазир Нарендра Моди ҳукумати томонидан тақдим этилган Вақф тўғрисидаги қонун лойиҳаси марказий Вақф кенгашига мусулмон бўлмаган аъзоларни киритишни таклиф қилади. Шунингдек, ҳукумат низоли вақф мулкларига эгалик ҳуқуқини аниқлаш ваколатига эга бўлади.
Қонун лойиҳаси мусулмон жамоаси ва Моди ҳукумати ўртасидаги зиддиятлар ортиб бораётган бир пайтда киритилди. Мусулмонлар ҳужжатни ўз мулкларига бўлган ҳуқуқларини заифлаштириш ва уларни ҳимоя қилиш имкониятларини чеклашга қаратилган ҳаракат деб баҳоламоқда.
Озчиликлар ишлари бўйича вазир Кирен Рижижу бу ислоҳот коррупция ва нотўғри бошқарувга чек қўйишини, шунингдек, айрим мусулмон оилалари ва элита гуруҳлари назоратидаги мулкчилик қоидаларини қайта кўриб чиқиш имконини беришини айтди.
Лойиҳага кўра, Вақф кенгашида мусулмон бўлмаганларга иккита лавозим ажратилиши мумкин. Бироқ бу мусулмонларга ҳам ҳинд ибодатхоналари кенгашларида шундай имконият яратилишини англатадими? Моди ҳукумати Ислом ер фондини назорат қилишни истамоқда, аммо уларнинг муассасаларимизга аралашишга ҳаққи йўқ, дейди Бутун Ҳиндистон мусулмонлари шахсий ҳуқуқ кенгаши вакили Камал Фароуқи.
Pew Research Center прогнозларига кўра, 2050 йилга келиб Ҳиндистон дунёдаги энг кўп мусулмон аҳолига эга мамлакатга айланади. Шунга қарамай, мамлакат аҳолисининг тахминан 13 фоизини ташкил этувчи мусулмон жамоаси таълим, бандлик ва сиёсий вакиллик бўйича миллий ўртача даражадан орқада қолмоқда.
Мусулмон ташкилотлари Моди бошчилигидаги ҳукмрон партия ва ҳинд миллатчи гуруҳларини 2014 йилдан буён исломга қарши сиёсат юритишда, зўравонликни рағбатлантиришда ва мусулмонларга тегишли мулкларни бузишда айбламоқда. Бироқ Моди ва унинг партияси бу айбловларни рад этмоқда.
Изоҳ (0)