Туркияда суд 23 март куни Истанбул мэри Акрам Имамўғлини коррупция иши бўйича қамоққа олиш тўғрисида қарор чиқарди. Бу ҳақда CNN Турк телеканали хабар берди.
Маълум қилинишича, у Имамоғли иш бўйича суд жараёни тугагунига қадар қамоқда сақланади. Терговда Акрам Имамўғлидан ташқари 99 нафар гумонланувчига нисбатан жиноий уюшмани бошқариш, унга аъзолик, коррупция, порахўрлик, фирибгарлик, шахсга доир маълумотларни қонунга хилоф равишда эгаллаш ва кимошди савдосига коррупциявий аралашув каби айбловлар қўйилган.
Истанбул шаҳри мэри, мухолифатдаги Республика халқ партияси вакили Акрам Имамўғли 19 март куни қўлга олинганди. Бунинг ортидан Туркия шаҳарларида намойишлар авж олди. 22—март куни намойишларга чиққанларнинг 300 нафардан ортиғи қўлга олинди. Эрдўғон Истанбул мэри ҳибсга олиниши сабабли бўлаётган намойишларни кўча террори деб атади. Имомўғлининг қамоққа олинишига қарши акцияларга тақиқлар жорий этилди.
Бундан ташқари, Истанбул университети Имамўғлининг 1990 йилда Кипр шимолидаги хусусий университетдан унинг бизнес бошқаруви факультетига ўтишида йўл қўйилган қонунбузарликларни сабаб қилиб кўрсатиб, дипломини бекор қилди. Туркияда давлат раҳбари лавозими учун курашда фақат олий маълумотли номзодлар иштирок этиши мумкин.
Имамўғли бўлажак президентлик сайловларида Туркия етакчиси Ражаб Тоййиб Эрдўғоннинг асосий рақиби ҳисобланган. Туркия адлия вазири Йилмаз Тунч юз бераётган воқеаларнинг амалдаги президентга ҳеч қандай алоқаси йўқлигини айтди.
