Туркияда Истанбул мэри Акрам Имомўғли қамоққа олинганидан сўнг оммавий норозилик намойишлари бошланган эди. Мамлакатда фаолият олиб бораётган телеканалларга мазкур намойишларни ёритиш тақиқланди.
Туркия радио ва телевидение олий кенгаши раиси Абубакир Шоҳин норозилик намойишларини тўғридан-тўғри эфирга узатишни тўхтатишни талаб қилган. Акс ҳолда бундай телеканаллар лицензиядан маҳрум этилади. Шоҳин намойишларни ёритиш “босиқ”, “холис” бўлиши ва “ҳокимиятнинг расмий маълумотлари ҳамда тушунтиришлари”ни ўз ичига олиши кераклигини таъкидлаган.
Шундан сўнг TRT Haber, НTV ва CNN Тurk каби каналлар намойишлар тўғридан-тўғри эфирга узатишни тўхтатган. Улар сиёсатчиларнинг нутқлари ва фикрларини орқали митингларни ёритишни давом эттирмоқда. Туркия ҳукумати аввалроқ Х, YouTube, Instagram ва TikTok платформаларига киришни чеклаган эди. Х компанияси эса баъзи турк мухолифатчиларининг аккаунтларини ўзи блоклаган.
Туркияда норозилик намойишлари президентлик сайловларида Эрдўғоннинг рақиби бўлиши кутилаётган 54 ёшли Имомўғли 19 март куни қўлга олинганидан кейин бошланди. Намойишлар Анқара, шунингдек, Истанбул, Измир, Адана, Анталия, Коня ва бошқа бир қатор шаҳарларда бўлиб ўтмоқда.
Уларда 550 мингга яқин киши иштирок этмоқда. 23 март куни ички ишлар вазири Али Ерликая 323 нафар намойишчи қўлга олингани ҳақида ҳисобот берди. Бир кун олдин бу кўрсаткич 343 кишини ташкил этган. Истанбул, Анқара ва Измирда полиция намойишчиларга қарши кўздан ёш оқизувчи газ ва сув пуркагичлардан фойдаланган. Шунингдек, ижтимоий тармоқларда кўчага чиқишга чақирувчи “провокацион постлар” жойлаштиргани учун 94 кишини қўлга олинган.
Имомўғли 2019 йилда Истанбул мэри этиб сайланган ва 2024 йилда қайта сайланган. У коррупция, порахўрлик ва террорчилар билан ҳамкорлик қилишда гумонланиб ҳибсга олинган, сиёсатчи барча айбловларни рад этган. Унинг Республика халқ партияси Имомўғлининг ҳибсга олинишини сиёсий деб атади.
Эрдўғоннинг айтишича, Туркия расмийлари жамоат тартибининг бузилишига йўл қўймайди. У намойишларни “кўча терроризми” деб атади ва мухолифатни Истанбул мерининг ҳибсга олинишини сиёсийлаштиришда айблади.
Изоҳ (0)