Ўзбекистонда қайси соҳа ходимлари энг кўп коррупциявий жиноят содир этаётгани маълум қилинди

Ўзбекистонда 2023 йилда судлар томонидан кўрилган жиноят ишлари таҳлили коррупцияга оид жиноятлар сони Сурхондарё ва Андижон вилоятларида ортганини кўрсатди. Бу ҳақда Сенатнинг 21 сентябрь куни бўлиб ўтган ялпи мажлисида маълум қилинди.

Мажлисда Ўзбекистонда коррупцияга қарши курашиш тўғрисидаги учинчи миллий маъруза муҳокама қилинган. Қайд этилишича, 2023 йилда республика бўйича судлар томонидан кўрилган жиноят ишлари таҳлили коррупцияга оид жиноятлар оқибатида давлат манфаатларига етказилган зарарнинг юқори улуши Андижон, Наманган, Қашқадарё ва Тошкент вилоятларига тўғри келган.

Коррупцияга оид жиноят ишлари бўйича судланган шахсларнинг аксарияти мактабгача ва мактаб таълими муассасалари, тижорат банклари, соғлиқни сақлаш ташкилотлари ҳамда ҳокимликлар ходимлари ҳисобланади.

Шунингдек, ички назорат тузилмалар фаолиятини ташкил этишда айрим давлат идоралари томонидан камчиликларга йўл қўйилган. Жумладан, ички назорат тизими жорий этилган давлат идораларининг 37 тасида ташкил этилган 996 та штат бирлигидан 172 таси (17,2 фоиз) вакант бўлса, 6 та ташкилотнинг 35 нафар ходимига қўшимча вазифалар юкланган.

Муҳокама жараёнида Сенат аъзолари томонидан Коррупцияга қарши курашиш агентлиги, қатор вазирлик ва идоралар, маҳаллий давлат ҳокимияти органларининг коррупцияга қарши курашиш бўйича фаолиятини янада такомиллаштиришга қаратилган қатор таклифлар билдирилди. Хусусан, коррупцияга оид жиноятларни таҳлил қилган ҳолда жиноятлар кўрсаткичи ошган давлат органлари ва ташкилотларида кечиктириб бўлмайдиган чора-тадбирлар белгилаш лозимлиги, коррупция ҳақида хабар берган шахсларни рағбатлантириш тизими бўйича тарғибот-ташвиқот ишларини жадаллаштириш зарурлиги айтилди.

10 сентябрь куни Қонунчилик палатаси йиғилишида 2023 йилда коррупция жинояти учун судланган 566 нафар шахс давлат хизматига қайта ишга киргани ва коррупция жиноятларини такрор содир этгани айтилганди. 

2023 йилда 39 та вазирлик ва идора учун коррупциявий хавф-хатарлар хариталари тўлиқ шакллантирилиб, уларнинг фаолиятига доир умумий 1701 та функциядан 177 тасида коррупциявий хавф-хатарлар даражаси “юқори”, 475 тасида “ўрта”, 1049 тасида “паст” баҳоланган.