“Коррупция” сўзи 2017 йилдан кейин норматив базага кириб келган. Бу ҳақда Ҳуқуқни муҳофаза қилиш академияси бошлиғининг биринчи ўринбосари Евгений Коленко 3 июль куни Коррупцияга қарши курашиш агентлигида бўлиб ўтган матбуот анжуманида айтиб ўтди, дея хабар бермоқда “Дарё” мухбири.
-vnfqaWJ4.jpg)
Анжуманда “Аҳоли ва давлат хизматчиларининг коррупцияга қарши курашиш соҳасидаги билимларини узлуксиз ошириш тизимини жорий қилиш чора-тадбирлари тўғрисида”ги президент қарорининг мазмун-моҳияти юзасидан журналистлар саволларига жавоб берилди.
Тадбирда иштирок этган Ҳуқуқни муҳофаза қилиш академияси бошлиғининг биринчи ўринбосари Евгений Коленко Ўзбекистон ҳукумати коррупция борлигини 2017 йилда тан олган.
Ўша йили “Коррупцияга қарши курашиш тўғрисида”ги қонун қабул қилинган. Ундан кейин коррупция сўзи норматив базага кириб келди ва илмий омма учун ҳам янгилик бўлди, — деди Евгений Коленко.
Академия масъулининг алоҳида таъкидлашича, мустақилликдан — 1991 йилдан 2017 йилга қадар коррупцияга қарши курашиш бўйича илмий иш ҳам, тадқиқот ҳам қилинмаган.
Президент қарорига кўра, 2025- йил 1 январдан аҳоли ва давлат хизматчиларининг коррупцияга қарши курашиш соҳасидаги билимларини узлуксиз оширишга қаратилган “Коррупцияга қарши курашиш виртуал академияси” электрон платформаси жорий этилади. Виртуал академияда ўқув фаолиятини ташкил этиш ва юритиш Коррупцияга қарши курашиш агентлиги ҳамда Ҳуқуқни муҳофаза қилиш академияси томонидан амалга оширилади.
Виртуал академияда ўқитиш қуйидаги контингент учун олиб борилади:
- аҳоли, тадбиркорлик субъектлари, нодавлат нотижорат ташкилотлари ва бошқа фуқаролик жамияти институтлари вакиллари;
- таълим ташкилотлари тарбияланувчилари, ўқувчилари ва талабалари;
- давлат органлари ва ташкилотларининг давлат хизматчилари;
- давлат иштирокидаги корхоналарнинг ходимлари.
Виртуал академияда ўқитиш базавий (барча фойдаланувчилар учун бепул) ҳамда махсус ўқув курслари (тўлов-шартнома асосида) бўйича йўлга қўйилади.
Изоҳ (0)