Туркия президенти Ражаб Тоййиб Эрдоғон Истанбулда давом этаётган намойишлар “зўравонлик тўлқини”га айланганини маълум қилиб, ушбу намойишлар фонида мухолифатни турк халқининг “асабига тегмасликка” чақирди. У бугун, 24-март куни Анқарада ўтказилган ҳукумат йиғилишидан сўнг халққа қилган мурожаатида шундай деган.
“Мен сизларни бир неча бор фуқароларимизнинг осойишталигини бузмасликка чақирганман. Агар журъатингиз етса, коррупция, ўғрилик, пора олиш ва қонунбузарликлар учун ҳисобот беринг. Агар ҳозирги терговдаги айбловлар ва қамоққа олинганлар учун кафиллик қила олсангиз, чиқиб буни очиқ айтинг. Агар бундай қилишни истамаётган бўлсангиз, халқнинг асабига тегманг. Шиорлари ва дунёқарашини ўзлаштирган чекка сўл ташкилотларни полициямизга қарши қайраманг”, деган Туркия раҳбари ўз мурожаатида.
Туркияда оммавий норозилик намойишлари 19 март куни Истанбул мэри Акром Имомўғли терроризм ва коррупцияда айбланиб қамоққа олинганидан сўнг бошланди. Туркиянинг мухолифатдаги Республика халқ партияси 22 март куни фақат Истанбулнинг ўзида 1 миллиондан ортиқ одам кўчага чиққанини билдирди. Йирик шаҳарларда полиция намойишчиларга қарши кўздан ёш оқизувчи газ ва сув пуркагичларни қўллади.
23 март куни, суд коррупцияда гумонланаётган Истанбул мэри Акром Имомўғлини қамоққа олиш тўғрисида қарор чиқарди. Имомўғли билан бирга шаҳар ҳокимлигининг бир қатор юқори лавозимли амалдорлари ҳам қамоққа олинган, жами 90 дан ортиқ киши суд жараёнига жалб қилинган.
Шундан сўнг Акром Имомўғли ижтимоий тармоқлар орқали халқни намойишга чиқишга ундади. Унинг айтишича, аҳоли айнан ҳозир эркинлик учун курашиши зарур.
Изоҳ (0)