Кэтрин Зета-Жонс 52 ёшда: Актриса қандай қилиб ёшлик ва гўзаллигини сақлашнинг уддасидан чиққан?

Кеча, 25 сентябрь куни «Зорро ниқоби» юлдузи Кэтрин Зета-Жонс 52 ёшни қаршилади. Ушбу фильм суратга олинганига 20 йил бўлган бўлса-да, актриса ҳали ҳамон ёш ва бетакрор кўринади. «Оскар» мукофоти совриндори сайёранинг энг гўзал аёллари рўйхатидан ўрин олган. Бунинг сири нимада? Қуйида ушбу саволга жавоб берамиз.

Тери ва сочлар парвариши

Актриса ўзига қарашга етарлича кўп вақт ажратади. Ҳар якшанба юзига ниқоб, қўлларига маникюр қилади ва сочига иссиқ ёғ суртади. Шунингдек, сартарошга сочларини кестириш учун тез-тез бориб турадиган Кэтрин, ишидан бўш вақтда фэн ва дазмол ишлатмасликни афзал билади. Териси таранг ва тиниқ экани ҳисобига кўпчилик уни жарроҳлик амалиёти, косметик воситалардан ҳаддан ортиқ равишда фойдаланади деб ҳисоблайди. Аммо пластикага қарши бўлмаган юлдуз, бир марта ҳам тиғ остига ётмаганини таъкидлайди. «Агар жарроҳлик амалиётидан кейин ўзингизни яхши ҳис қилсангиз, ким бўлибманки, буни нотўғри деб айтсам».

Макияж

Макияжда кўзларига урғу беришни яхши кўришини таъкидлайдиган актриса, туш ва подводка суртмасдан кўчага чиқмайди. Кўзларини ёрқин қилиб бўяшга бўлган қизиқишни уйғонишига севимли кумирлари Элизабет Тэйлор, Софи Лорен, Брижит Бардо ва Энн-Маргрет сабаб бўлган.

«Мен текис чизилган подводкани ёқтирмайман. Мен бунинг учун қаламдан фойдаланиб табиийдек кўрсатишга ҳаракат қиламан. Бу менинг кундалик макияжим. Қолаверса, мен киприклар учун, албатта, қайиргичдан фойдаланаман. Мен уларни ҳатто одам яшамайдиган оролга ҳам ўзим билан олиб кетган бўлардим. Кейин эса киприкларимга бир неча қатлам қилиб туш суртаман. Сўнгра кўз учун қора қаламни такрор суртаман», — деган у. Косметикага бўлган севгиси сабаб ўзининг Casa Zeta-Jones номли брендига асос солган.

Спорт

Бўш вақтида Кэтрин тоза ҳавода сайр қилишни, сузишни, теннис, ёга, сапсерфинг билан шуғулланишни яхши кўради. Унинг айтишича, жисмоний машқлар нафақат қоматини сақлашга, балки руҳий ҳолати яхшиланишига ҳам ҳисса қўшади. Унинг фаол турмуш тарзи ҳақида тасаввурга эга бўлиш учун Instagram саҳифасини кузатиш кифоя қилади.

Овқатланиш

Кун давомида уч марта овқатланадиган юлдуз, нонуштани асло канда қилмайди. Қишда у банан, қорағат ёзда эса ёғсизлантирилган йогурт ва гранола истеъмол қилади. Тушлик ва кечки овқатни рукола, исмалоқ, кедр ёнғоғи, помидор пишлоқ, зайтун ёғи, бальзамли сирка ва хантал қўшилган салатсиз тасаввур қила олмайди. Асосий овқат сифатида эса грилда пиширилган товуқ ёки балиқ ё бўлмаса, қиймали бақлажон ейишни афзал билади. Гўзаллик инсоннинг қалбидан бошланишига ишончи комил бўлган Кэтрин, кўп миқдорда сув ичишни канда қилмайди. Шу билан бирга 8 соатлик уйқу ва тўғри овқатланишга амал қилади ҳамда спиртли ичимликларни истеъмол қилмайди.