Лотин америкалик Женнифер Лопес бугунги кунда муваффақиятли актриса, хонанда, раққоса, модель ва ўз гўзаллигини сақлаб қолган бетакрор она. У 1969 йилда Нью-Йоркда туғилган ва ўз фаолиятини мусиқий видеолар ва телекўрсатувларда раққоса сифатида бошлаган.
Жей Ло соғлом турмуш тарзининг учта қоидаси бор: спорт, уйқу ва тўғри овқатланиш. У болалигидан спорт билан фаол шуғулланиб келмоқда. Гимнастика ва софтболни яхши кўрадиган юлдуз ўзининг гўзаллик ва саломатлик сирлари билан бўлишди.
Доимий жисмонан фаол бўлиш ва нафас олиш машқлари
Женнифер Лопес ҳар куни тонгда югуриш, ёга ва 20 дақиқалик медитацияни бажаришга ҳаракат қилади. У тез-тез кардио машғулотлар бажаради, рақс тушади ва бадантарбия қилади. Руҳан дам олиш, ташвишларни бир оз унутиш ва салбий фикрлардан халос бўлишда нафас олиш машқлари унга ёрдам беради. Шунингдек, соғлом уйқу саломатлик учун муҳимдир.
Фойдали ва табиий маҳсулотлар истеъмол қилиш
Актриса қадди-қоматини сақлаб қолиш учун таомномасига жиддий эътибор беради. Унинг тонги мевали ва протеинли коктейл билан бошланади, тушликда эса табиий оқсилга бой озиқ-овқатларни афзал кўради. Хонанда тушликни 18:30 дан кейинги вақтга қолдирмайди.
Терини парвариш ва ҳимоя қилиш
Ҳар куни тозалаш, намлаш ва қуёшдан ҳимояловчи воситалардан фойдаланиш Женнифернинг кундалик юзни парвариш қилишига асосланган учта асосий қоидадир. У уйдан ташқарига чиқишни режалаштирмаган бўлса ҳам, кундалик одатларини тарк этмайди.
Терини намлаш ва мимик ажинларни текислаш учун актриса зайтун ёғидан иборат махсус косметикалардан фойдаланади. Кремларни юздан ташқари бўйин, елка ва ҳатто қулоғига ҳам суртишни унутмайди. Сочлар парвариши учун Жей Ло кокос мойидан фойдаланади.
Буткул ўзгартириб юборадиган эмас, балки гўзалликка урғу берадиган макияж
Женнифер Лопес жигарранг ва кулранг тенлардан фойдаланишни яхши кўради. Қандай макияж қилишдан қатъи назар хонанда табиийликни йўқотмасликка ва энг гўзал томонларига урғу беришга ҳаракат қилади.
Унинг фикрича, агар сиз қалбан бахтсиз бўлсангиз, кўзларингиздаги қайғуни ҳеч қандай бўёқ яшира олмайди. Инсонлар кўз орқали юрагингизни ҳис қилади. Шунинг сабаб косметикадан ҳақиқий “мен”ингизни яшириш учун эмас, балки афзал томонларингизни кўрсатиш учун фойдаланиш керак.
Руҳан кучли бўлиш
Женнифер Лопес ўзининг иродали ва қатъиятли характери билан ҳам бошқа машҳурлардан ажралиб туради. У чиндан ҳам истасангиз ва имкон қадар кўпроқ ҳаракат қилсангиз, барча нарсанинг иложи борлигига қаттиқ ишонади. Женнифер оғир кунларда ҳам руҳиятини чўктирмасликка ва ҳаётида нима бўлишидан қатъи назар, мақсадлар сари қадам ташлашда давом этади.
Болалигида Жей Ло раққоса бўлишни истаганида атрофдагилар унинг устидан кулар, ҳеч қачон ишонч билдирмас эди. Аммо бундай салбий фикрлар юлдузнинг янада кўпроқ меҳнат қилишига ундаган:
Мен бахтни ташқаридан топаман, бахтни менга бошқа бир одам бериши керак, деб ўйлар эдим. Кейинроқ улғайгач, бу тушунча хато эканлигини англадим. Агар ўзингизни қадрласангиз, ҳаётдаги ролингизни тушунсангиз, сиз энг бахтли инсон бўласиз, — дейди Лопес.
Изоҳ (0)