Fransiya birinchi xonimi Brijit Makron nafaqat siyosiy doiralarda, balki o‘ziga xos go‘zallik va uslub ramzi sifatida ham butun dunyo e’tiborida. 70 yoshdan oshganiga qaramay, u hali ham zamonaviy ko‘rinishi, tetikligi va o‘ziga bo‘lgan ishonchi bilan barchada hayrat uyg‘otadi. Undan ilhomlanayotgan minglab ayollarni bir savol qiziqtiradi: “Xonimning go‘zallik va salomatlik sirlari nimada?”
Soch turmagi
Uzun bob uslubidagi, kumush rangdan sarg‘ish tusgacha tovlanuvchi sochlari fen bilan quritilib, ortiqcha shakl bermasdan hajm berilgandek ko‘rinadi. Bunday tabiiy va to‘lqinsimon sochlar fransuz ayollariga xos jozibani ifodalaydi. Qalin cho‘lka (peshonaga tushgan sochlar) esa Brijit Makronni yanada yosh ko‘rsatadi.
Oftobda toblangan teri tusi
Brijit har doim go‘yoki dengiz sohillarida o‘tgan ta’tildan qaytgandek ko‘rinadi: uning yuzi oftobda yengil toblanganga o‘xshaydi. Bunday rumyanadan foydalanish teriga sog‘lom va dam olgandek ko‘rinish beradi.
Makiyaj
Yorqin va to‘q rangli lab bo‘yoqlari Makron xonim uchun yot kosmetika. U lablar uchun tabiiy, och ranglar va yarim shaffof teksturalarni tanlaydi. Bunday makiyaj odatda yoshroq avlod ayollariga xos uslub. Shuningdek, u asosiy e’tiborni ko‘zlarga qaratadi va qalam, tushni ayamaydi. Brijit ancha vaqtdan beri tashqi ko‘rinishida hech qanday tajriba o‘tkazmaydi va yillar davomida bir xil obrazga amal qiladi.
Tabassum
Brijit Makronni rasmiy suratlarda jiddiy yoki kayfiyatsiz holda uchratish qiyin. U deyarli har doim kameralar oldida yorqin tabassum bilan porlaydi. Bu o‘ziga ishonch ramzi bo‘lib, ayollik latofatiga yanada joziba bag‘ishlaydi.
Ovqatlanish tartibi
Birinchi xonimning bo‘yi 164 santimetr, vazni esa atigi 45 kilogramm. U 34 o‘lchamdagi liboslarni kiyadi. Bu ko‘rsatkichlar ortida katta mehnat yotadi. Brijit nafaqat o‘zining, balki turmush o‘rtog‘i Emmanuel Makronning ham ratsionini qattiq nazorat qiladi.
Yelisey saroyining bosh oshpazi Giyom Gomes shunday degan:
“Brijit har kuni unga o‘n xil meva va sabzavotdan iborat taomlar tayyorlanishini so‘ragan. U go‘shtdan ko‘ra baliq iste’mol qilishni afzal ko‘radi. Yagona istisno — vaqti-vaqti bilan ichiladigan bir bokal oq vinodir. Shuningdek, u Parijdagi La Rotonde restoranida dengiz mahsulotlari assortisini tanlaydi, Les Sports kafesida esa krabli taomlarni buyurtma qiladi”.
Shirinliklar va zararli mahsulotlar esa mutlaqo taqiqlangan. Makronning saylov kampaniyasi haqida suratga olingan hujjatli filmda shunday kadrlar bor: Emmanuel rasmiy uchrashuvdan so‘ng charchagani uchun shokolad so‘raydi, Brijit esa uning sobiq o‘qituvchisi sifatida e’tiroz bildiradi:
“Men bunday jirkanch narsalarni yeyishingni istamayman”, deydi.
Shunda Makron: “Xo‘p, unda menga suv ber”, deya rozi bo‘ladi.
Sport
Sport mashqlari birinchi xonimning kundalik rejimiga kiritilgan. U har tongda bir soat velotrenajyorda vaqt o‘tkazadi. Ba’zida qo‘riqchilar hamrohligida Sena bo‘ylab yoki Yelisey saroyi bog‘larida bir necha kilometr yuguradi.
Izoh (0)