Ўзбекистонда 2025 йил март ойида 26 711 минг нафар фуқарога бир марталик нафақа тўловлари тўлаб берилди. Бу ҳақда Ижтимоий ҳимоя миллий агентлиги хабар берди.
Маълум қилинишича, Ижтимоий ҳимоя миллий агентлиги томонидан 2025 йил март ойида 26 711 минг нафар фуқаро учун 32,8 млрд сўм бир марталик нафақа тўловлари тўлаб берилди. Шундан:
- 14 364 нафар фуқарога 11,6 млрд сўм — фарзанд туғилганда бериладиган бир марталик (суюнчи) нафақаси;
- 12 347 нафар фуқарога 21,1 млрд сўм — дафн этиш учун нафақаси тўлаб берилди.
Маълумот учун: 2025 йил февраль ойида 27 635 минг нафар фуқаро учун 33,8 млрд сўм бир марталик нафақа тўловлари тўлаб берилган.
Март ойида тўланган нафақалар
Жами I ва II гуруҳ ногиронлик нафақаси олувчилар сони 315 057 нафарни ташкил этиб, уларга март ойи учун жами 303,5 млрд сўм пул маблағлари тўлаб берилган. Шундан:
- I гуруҳ ногиронлик нафақаси олувчилар сони: 38 574 нафар. Нафақа миқдори эса: 1 027 000 сўм.
- II гуруҳ ногиронлик нафақаси олувчилар: 276 483 нафар. Нафақа миқдори: 920 000 сўм.
Бундан ташқари, I гуруҳ кўз бўйича ногиронлик нафақаси бўйича 4 782 нафар шахс уй-жой коммунал хизматлари учун компенсация олади. Тўлов миқдори: 192 600 сўм. Юқорида келтирилган уч тоифалардаги нафақа олувчиларга март ойида жами 931,8 млн сўм маблағлар тўлаб берилган.
18 ёшгача болаликдан ногиронлик нафақаси олувчилар сони 171 380 нафарни ташкил этади. Миқдори: 920 000 сўм. Жорий йилнинг март ойи учун 163,6 млрд сўм тўлаб берилган.
Шунингдек, ҳозирги вақтда 75 390 нафар шахс 18 ёшгача болаликдан ногиронлиги бўлган болани парваришлаш нафақасини олиб келмоқда. Нафақа миқдори: 745 000 сўм. Март ойида бу тоифадаги шахсларга 57,6 млрд сўм маблағлар тўлаб берилган.
Изоҳ (0)