Санъаткорлар оиласи, устоз актёрлар Саида Раметова ва Жумадулла Раметов “Миллий” каналининг “Иккаламиз” лойиҳаси учун интервью берди. Интервью давомида улар оила қуриш жараёнидаги қизиқарли севги тарихини ёдга олди.
Саида ва Жумадулла Раметовлар театрда ишлаб юрган кезлари ҳали турмуш қурмасданоқ бир-бири билан дўст бўлган. Уларнинг севги тарихи эса шундай бошланган:
— Жумадулла жуда келишган йигит эди, оилада бир ўғил фарзанд бўлган. Ёши ҳам 27 га яқинлашганда қариндошларнинг гап-сўзи туфайли қайнотам энди сени уйлантирамиз, деган. Жумадулланинг менда кўнгли бор экан, менга турмушга чиқишни таклиф қилганда, келишган, яхши йигит-ку, дея ўйланиб майли, дегандим. У вақтда ҳали мен у кишини севиб қолмагандим, шунчаки инсон сифатида ҳурмат қилардим. Шу орада унинг танишларидан Жумадуллага ўзи тарафдан бир қариндош қизни мўлжаллаб қўйишган, деган гапни эшитиб қолдим. Унинг исми ҳам Саида эди, пешоналарига Саидалар ёзилган экан-да (кулиб). Кейин ота-онаси ўша қизни олиб бермоқчи бўлса, мен уларнинг ўртасига тушиб бахтини бузмайман, деганман ва Жумадулла билан дўст бўлиб қолишга келишганмиз. Сўнг билсам, у қизни шунчаки кўзлаб юришган экан, ҳаммада ҳам бўлади-ку, шундай-да, дея эслади Саида Раметова.
“Жумадулла қиз ўғирлаб келди”
— Хуллас, шундай қилиб бир куни театрда чарчаб ўтирган вақтим эди. Жумадулла “Дўстмиз-ку, юринг, сизга музқаймоқ олиб бераман” деди. Ёлғиз ўғил бўлгани учун отаси совға қилган машинаси бор эди, шунга ўтирганман. Узоқ юрганмиз, нега тўхтай қолмаяпти, деб бир вақт қарасам, машинани мингга қўйиб Туркистон томонга ҳайдаб кетяпти. Тўхтатинг, мен тушаман дейишимга қарамай, мени Туркистондаги қариндошларининг уйига олиб борган. “Вой, Жумадулла қиз ўғирлаб келди” деб бирпасда гап тарқалган. Уларнинг оиласи Туркистон ва Қозоғистонда яшайдиган ўзбеклар эди, у тарафларда қиз олиб қочиш одатий ҳол бўлган. Лекин менинг ота юртим Самарқандда бундай қилинмайди, менга уйланмоқчи бўлсангиз, ҳурмат-обрўйимни жойига қўйиб уйланинг, бундай олиб қочиб кетиб эмас, деб қаттиқ гапирганман. Эртаси куни қайнона-қайнотам етиб келишган ва менга “Раҳмат қизим, жуда ақлли қиз экансан, барака топ” дейишди. Актриса бўлса ҳам, ҳурматини биладиган, ўзига пишиқ қиз экан, бизга ёқди, дея рози бўлишган. Тўйимиз 1981 йилда жуда чиройли бўлиб ўтган, Жумадулла 27 да, мен 25 ёшда бўлганман.
“Соғайиши учун боримни берардим”
Саида Раметовага шунча йил ижод қилдингиз, халқнинг кўнглидан жой олдингиз ва шунинг эвазига кўплаб мукофотлар, унвонлар соҳиби бўлдингиз — шу унвонларингизни биргина орзуйингиз амалга ошиши учун алмашиш имкони бўлса, бу ниманинг эвазига бўларди, дея берилган саволга актриса:
“Турмуш ўртоғимнинг бутунлай соғайиб кетишига боримни алмашардим”, дея кўзларида ёш билан жавоб берди.
“Ҳозир уйдаманми, теартрдами, дея сўрайдиган бўлиб қолганди”
Жумадулла Раметовнинг бетоблиги ҳақида кўпчиликнинг хабари бор, аммо актёрнинг бугунги ҳолати анча яхши. Карантин вақтида у вирус билан касалланган, сўнг соғайган бўлса-да, аста-секинлик билан хотира йўқотиш ҳолати кузатила бошлаган. Саида Раметованинг сўзларига кўра, Жумадулла Раметов аввалига кичик нарсаларни эсидан чиқарган, сўнг “Ҳозир уйдаманми, театрдаманми?” дея сўрайдиган бўлган. Бундан хавотирланган оила аъзолари актёрни шикофорга олиб борган. Врачлар кексайиб қолган актёрга хотира сустлашиши дея Альцгеймер касаллиги ташхисини қўйган, буни аввал коронавирусга чалинганлик асорати билан боғлаган. Узоқ даволанишлардан сўнг Жумадулла Раметов аввалги ҳолатига қараганда бугун анча тетик.
— Ҳозирда турмуш ўртоғим нафақа олади, аввалроқ ишламаса ҳам, театрдан ойлик берилаётганди. Йўқ, театрга ишга бормаяпман, ойлик керакмас, меникини ҳам ёшларга беришсин, деган. Шунча йил ишладингиз, сизни сийлашяпти, десам ҳам кўнмаган. Мен тўй хизматлари ёки сёмкалар сабаб театрга боролмаган кунларим бўлган. Аммо Жумадулла Раметов бирор марта театрга хиёнат қилмаган инсон, дейди Саида Раметова.
Изоҳ (0)