АҚШ олимлари бункерлар каби чуқур жойлашган нишонларни йўқ қилишга қодир янги термоядровий қурол устида изланиш олиб бормоқда.
Миллий лабораториялар самолётдан ташланадиган ядровий қуролнинг энг сўнгги версияси — B61-13 ни ишлаб чиқаришга киришди. У бир вақтнинг ўзида ҳам тактик, ҳам стратегик ядровий қурол ҳисобланади. Бундай универсаллик иккита хусусиятга боғлиқ.
- Биринчидан, унинг қуввати 10 дан 360 килотоннагача тротил эквивалентида ўзгартирилиши мумкин.
- Иккинчидан, бомба ҳавода белгиланган баландликда, ерга тегиши биланоқ ёки бир оз кечикиб портлаши мумкин.
Ҳавода портлаш зарба майдонини кенгайтирса, кечиктирилган портлаш эса назарий жиҳатдан чуқур жойлашган қўмондонлик пунктлари ва яхши ҳимояланган нишонларга кўпроқ зарар етказиши мумкин. Минимал қувватда портлатилганда, B61-13 душманни йўқ қилиш билан бирга, яқин атрофдаги Америка қўшинларига жиддий зарар етказмайди. Максимал қувватда эса нишон сифатида бутун бир шаҳар ёки заиф ҳимояланган кенг ҳудудлар танланиши мумкин.
Қурол термоядровий бомбанинг олдинги версияси — қуввати ўхшаш B61-7 ни қайта ишлаш орқали тайёрланади. Аввалгиси паст аниқликка эга бўлиб, атомга қарши бункерлар ва бошпаналарни йўқ қилишга яроқсиз эди. Энди дум қисмининг ўзгартирилиши ва бошқариладиган стабилизаторларнинг қўшилиши туфайли бомбанинг нишондан четга оғиши 30 метр доирасида бўлади. Бу уни бункерлар ва қўмондонлик пунктларига қарши тактик жиҳатдан самарали қилади.
Изоҳ (0)