AQSH olimlari bunkerlar kabi chuqur joylashgan nishonlarni yo‘q qilishga qodir yangi termoyadroviy qurol ustida izlanish olib bormoqda.
Milliy laboratoriyalar samolyotdan tashlanadigan yadroviy qurolning eng so‘nggi versiyasi — B61-13 ni ishlab chiqarishga kirishdi. U bir vaqtning o‘zida ham taktik, ham strategik yadroviy qurol hisoblanadi. Bunday universallik ikkita xususiyatga bog‘liq.
- Birinchidan, uning quvvati 10 dan 360 kilotonnagacha trotil ekvivalentida o‘zgartirilishi mumkin.
- Ikkinchidan, bomba havoda belgilangan balandlikda, yerga tegishi bilanoq yoki biroz kechikib portlashi mumkin.
Havoda portlash zarba maydonini kengaytirsa, kechiktirilgan portlash esa nazariy jihatdan chuqur joylashgan qo‘mondonlik punktlari va yaxshi himoyalangan nishonlarga ko‘proq zarar yetkazishi mumkin. Minimal quvvatda portlatilganda, B61-13 dushmanni yo‘q qilish bilan birga, yaqin atrofdagi Amerika qo‘shinlariga jiddiy zarar yetkazmaydi. Maksimal quvvatda esa nishon sifatida butun bir shahar yoki zaif himoyalangan keng hududlar tanlanishi mumkin.
Qurol termoyadroviy bombaning oldingi versiyasi — quvvati o‘xshash B61-7 ni qayta ishlash orqali tayyorlanadi. Avvalgisi past aniqlikka ega bo‘lib, atomga qarshi bunkerlar va boshpanalarni yo‘q qilishga yaroqsiz edi. Endi dum qismining o‘zgartirilishi va boshqariladigan stabilizatorlarning qo‘shilishi tufayli bombaning nishondan chetga og‘ishi 30 metr doirasida bo‘ladi. Bu uni bunkerlar va qo‘mondonlik punktlariga qarshi taktik jihatdan samarali qiladi.
Izoh (0)