Қирғизистон Миллий хавфсизлик давлат қўмитаси раиси Қамчибек Ташиев полиция ходимлари ва маҳаллий амалдорлардан 1 декабрга қадар барча фоҳишахоналар ва бошқа жинсий алоқа хизматлари кўрсатувчи кўнгилочар муассасаларни ёпишни талаб қилди. Бу ҳақда махсус хизмат раҳбари 30 ноябрь куни МХДҚнинг Балиқчи шаҳридаги янги биносининг очилиш маросимида маълум қилди, деб ёзади “24.kg” ҳуқуқ-тартибот идорасига таяниб.
Ташиев ўз қўл остидагиларидан маҳаллий ҳокимият органларининг жинсий алоқа хизматлари кўрсатувчи ҳаммом мажмуалари ва уйларнинг ноқонуний фаолиятини қандай назорат қилишига алоҳида эътибор қаратишни сўради. Унинг таъкидлашича, давлат ва муниципал органлар раҳбарлари, ҳуқуқни муҳофаза қилувчи органлар ходимларига 1 декабрга қадар мамлакатдаги барча бундай муассасалар фаолиятини тўхтатиш бўйича топшириқ берилган.
“Агар Миллий хавфсизлик давлат қўмитаси фоҳишахона фаолиятини давом эттираётганини аниқласа, маҳаллий ҳокимликларнинг масъул ходимлари ишдан бўшатилади”, — деди Ташиев.
Хавфсизлик ходими ўз нутқида жинсий алоқа хизмати кўрсатувчи қизларнинг шахси ҳақида батафсил тўхталиб ўтди. Хусусан, улар орасида гўзаллик танловлари иштирокчилари, юз минглаб обуначига эга блогерлар, тадбиркорлар ва амалдорларнинг қизлари борлигини айтди. Разведка хизмати раҳбарининг сўзларига кўра, бойларга хизмат қилган 200 нафар элита фоҳишалари аниқланган ва улар соатига 500 доллардан 3000 долларгача пул ундирган. Ташиевнинг аниқлик киритишича, иш нафақат ҳуқуқбузарлар, балки уларнинг ота-оналари билан ҳам олиб борилади. Офицер, шунингдек, бундай қизлар хизматидан фойдаланадиган депутатлар ва давлат хизматчиларининг юзларини оммага ошкор қилиш билан таҳдид қилди.
“Мамлакатимизда энди ҳеч кимга аёлларимиздан интим хизмат кўрсатилмайди”, — дея хулоса қилди Ташиев.
Давлат қўмитаси раҳбари бундай хизматларга қарши курашиш билан бир қаторда суд-ҳуқуқ тизимида порахўрликнинг олдини олиш ва қирғиз-тожик чегарасида контрабандага барҳам бериш қўмитанинг устувор вазифаси эканини қўшимча қилди.
Сўнгги бир неча кун ичида Миллий хавфсизлик давлат қўмитаси ходимлари йирик шаҳарлардаги фоҳишахоналарда рейдлар ўтказди. Хусусан, бир кеча-кундузда Бишкекда ўнта шунга ўхшаш муассаса топилди, улардан баъзилари массаж салонлари сифатида “ниқобланган”. Хавфсизлик кучлари фоҳишахона эгалари ва уларнинг ишчиларини шарманда қилиш учун уларнинг юзларини оммавий сайтларда чоп этишга ваъда берди. Натижада интернетда қизлар ва уларнинг паспортлари туширилган юзга яқин фотосуратлар пайдо бўлди, баъзи кадрларда қирғизистонлик аёллар қўлларида ота-оналарининг исмлари ва шахсий телефон рақамлари ёзилган қоғоз варақларини ушлаб турган.
Разведка хизматининг хатти-ҳаракатлари турли хил реакцияга сабаб бўлди, кўплаб фойдаланувчилар қўмита аъзоларини ахлоқий меъёрлар ва шахсий маълумотлар тўғрисидаги қонунни бузганликда танқид қилишди. Ўз навбатида, Республика Омбудсман институти фотосуратларнинг эълон қилинишига салбий баҳо бериб, Миллий хавфсизлик давлат қўмитасини “уларнинг (фоҳишахоналардаги қизларнинг) юзларини кўрсатмасликка ва шахсий маълумотларни эълон қилмасликка чақирди.
“Бу уларнинг қонун билан белгиланган ҳуқуқлари бузилишидир”, — деб таъкидлади муассаса.
Изоҳ (0)