Фарғона шаҳрида Ўзбекистон Давлат хавфсизлик хизмати раиси Абдусалом Азизов, Қирғизистон вазирлар маҳкамаси раисининг ўринбосари – Миллий хавфсизлик давлат қўмитаси раиси Қамчибек Ташиев, Тожикистон Миллий хавфсизлик давлат қўмитаси раиси Соймўмин Ятимов ўртасида учрашув бўлиб ўтди.
Қайд этилишича, музокаралар давомида томонлар минтақавий хавфсизликни таъминлашга оид барча муаммолар тўпламини атрофлича муҳокама қилган. Терроризм, экстремизм, наркотик моддаларнинг ноқонуний айланмаси, ноқонуний миграция, контрабанда ва трансчегаравий характердаги бошқа таҳдидларга қарши курашиш каби долзарб соҳалардаги ҳамкорликнинг ҳолати ва истиқболлари юзасидан фикр алмашилган.
Шунингдек, томонлар давлатлар ўртасида чегарадош ҳамкорлик ва умуман олганда, яхши қўшничилик муносабатларини ривожлантириш учун қулай шарт-шароитлар яратиш масалаларига тўхталиб ўтган.
Мулоқот чоғида Қирғизистон ва Тожикистон ўртасидаги давлат чегараларини делимитация қилиш билан боғлиқ кун тартибидаги масалалар, шунингдек, Ўзбекистон ва Қирғизистон ўртасидаги чегарани демаркация қилиш масалалари конструктив тарзда кўриб чиқилган.
Учрашув иштирокчилари қирғиз-тожик чегараларини делимитация қилиш ва ўзбек-қирғиз давлат чегараларини демаркация қилиш жараёнларини жадаллаштириш бўйича келишувларга эришган ва томонларнинг ўзаро манфаатларини ҳисобга олган ҳолда ушбу масалаларни ҳал этиш бўйича амалий чора-тадбирларни белгилаб олган.
Музокаралар якунида Қирғизистон—Тожикистон ҳукуматлараро комиссияси аъзоларига чегаранинг қолган участкаларини мувофиқлаштириш, тегишли икки томонлама шартномани тайёрлаш ва имзолаш бўйича аниқ топшириқлар берилган.
Эслатиб ўтамиз, 2023 йилнинг кузида Қирғизистон ва Тожикистон ҳукумат делегацияларининг учрашувида “барча чегаравий муаммоларни ҳал қилиш учун асос бўладиган” баённома имзоланган эди. Бир неча кун олдин эса чегара муаммосини ҳал қилиш учун Қирғизистон ва Тожикистон ҳудудларни алмашиш вариантини кўриб чиқиши мумкинлиги тўғрисида хабар берилганди.
Изоҳ (0)