Қирғизистон ва Тожикистон 24 км чегара ва баҳсли ҳудудлардан фойдаланиш бўйича келишиб олди

Тожикистон ва Қирғизистон топографик ишчи гуруҳлари давлат чегарасининг яна 24,01 километр қисми устидан келишувга эришди. Бу ҳақда 5 декабрь куни Қирғизистон Вазирлар Маҳкамаси матбуот хизмати хабар берди.

Аниқлик киритилишича, икки давлат расмийлари ўртасидаги учрашувлар 29 ноябрдан — 5 декабрга қадар Тожикистоннинг Сўғд вилояти Бўстон шаҳрида давом этган. Музокаралар якунлари бўйича тегишли баённома тасдиқланди. Ҳужжатни ишчи гуруҳ раҳбарлари – Тожикистон ва Қирғизистон ер қўмиталари раҳбарлари – Ориф Хўжазода ва Назирбек Бўрубоев имзолади.

Бундан ташқари, чегарани демаркация ва делимитация қилиш бўйича комиссия иши доирасида ҳар икки республика махсус хизматлари раҳбарлари даражасида музокаралар бўлиб ўтган ва унда “асосий қарорлар” қабул қилинган.

Хусусан, энди икки республика бир-бирининг ҳудудида жойлашган объектлардан фойдаланиши мумкин бўлади.

Қирғизистон Тожикистон ҳудудида фойдаланадиган барча объектларга доимий, узлуксиз кириш имконияти бўлади, бироқ ер Тожикистонда қолади. Тожикистон Қирғизистон ҳудудида фойдаланаётган барча объектлар Тожикистон томонидан абадий фойдаланилади, ерлар эса Қирғизистон ҳудудида қолади. Бу масалани жамоатчиликка эълон қилиш энг асосий воқеа, — деди Тожикистон Миллий хавфсизлик давлат қўмитаси раҳбари Саймўмин Ятимов.

Унинг аниқлик киритишича, тегишли келишувлар Ворух—Хўжай-Аало йўли ва Торт—Кочо ҳудудига тааллуқли.

Қирғизистон томонидан Қамчибек Ташиев бу борадаги янгиликни тасдиқлаб, томонлар “тўлиқ ечим” топишга яқин эканини қўшимча қилди.

Қирғизистон ҳукумати, ўз навбатида, қолган ҳудудларни тавсифлаш бўйича ишлар Қирғизистон ҳудудида бўлиб ўтадиган навбатдаги йиғилишда давом этишини таъкидлади.

2023 йилда, айниқса сўнгги ойларда Тожикистон ва Қирғизистон ўртасидаги чегарани делимитация ва демаркация қилиш бўйича икки томонлама комиссия фаоллашди – ишчи гуруҳлар доимий равишда учрашувлар ўтказмоқда. Сўнгги уч ойнинг ўзида томонлар давлат чегарасининг қарийб 100 километри бўйича келишувни эълон қилди.

3—7 октябрь кунлари Боткенда икки давлат топографик ишчи гуруҳлари йиғилишида томонлар 43,32 киломтер, 12—18 октябрь кунлари Суғд вилоятининг Бўстон шаҳрида 13,98 километр чегара бўйича келишувга эришди. Ноябрь ойи бошида Бўстонда бўлиб ўтган топографик гуруҳлар йиғилишида давлат чегарасининг яна 17,98 километри тасдиқланди.